ஸ்காட்லாந்துக்கு எதிராக நெய்மர் 100% விளையாடுவார்..! பயிற்சியாளர் அன்செலாட்டி உறுதி!

பிரேசிலின் நட்சத்திர வீரர் நெய்மர் ஜூனியர் கால்பந்து உலகக் கோப்பை 2026ல் முதல்முறையாக பங்கேற்கவிருப்பதை அந்த அணியின் பயிற்சியாளர் கார்லோ அன்செலாட்டி உறுதிப்படுத்தியுள்ளார்.

கால்பந்து உலகக் கோப்பைப் போட்டிகள் கடந்த ஜூன் 11 முதல் அமெரிக்கா, கனடா, மெக்சிகோ ஆகிய நாடுகளில் நடைபெற்று வருகின்றன.

இதில் பிரேசில் குரூப் சி பிரிவில் இருக்கின்றன. முதல் போட்டியில் மொராக்கோ உடன் டிரா செய்த பிரேசில் தனது இரண்டாவது போட்டியில் ஹைதி உடன் வெற்றியைச் சுவைத்தது.

இந்த நிலையில், நாளை அதிகாலை 3.30 மணிக்கு நடைபெறும் போட்டியில் பிரேசில் ஸ்காட்லாந்தை எதிர்கொள்கிறது. காயம் காரணமாக முதலிரண்டு போட்டிகளில் விளையாடாமல் இருந்த நெய்மர் இந்தப் போட்டியில் பங்கேற்கவிருக்கிறார்.

இது குறித்து அணியின் பயிற்சியாளர் கார்லோ அன்செலாட்டி கூறியிருப்பதாவது: உலகக் கோப்பையில் பங்கேற்க, நெய்மர் 100 சதவிகிதம் தகுதியாக இருக்கிறார். அவர் நன்றாக பயிற்சி எடுத்து நலமுடன் இருக்கிறார். அவருக்காக நான் மகிழ்ச்சியடைகிறேன் எனக் கூறியுள்ளார்.

பிரேசில் அணிக்காக அதிக கோல்கள் (79) அடித்தவராக நெய்மர் இருப்பது குறிப்பிடத்தக்கது. 13 உலகக் கோப்பைப் போட்டிகளில் 8 கோல்கள் அடித்துள்ளார்.