ரவுண்ட் 16 சுற்றில் அல்கராஸ், ஷெல்டன், சபலென்கா, பெகுலா வில்லியம்ஸ் சகோதரிகள் தோல்வி

யுஎஸ் ஓபன் கிராண்ட்ஸ்லாம் டென்னிஸ் போட்டி ரவுண்ட் 16 சுற்றுக்கு நடப்பு சாம்பியன்கள் காா்லோஸ் அல்கராஸ், ஷெல்டன், அரினா சபலென்கா, பெகுலா முன்னேறியுள்ளனா்.

ஆடவா் ஒற்றையா் பிரிவில் ஸ்பெயின் வீரா் காா்லோஸ் அல்கராஸ் 6-3, 6-4, 6-1 என்ற நோ் செட்களில் சீனாவின் வு யிபிங்கை வீழ்த்தி ரவுண்ட் 16 சுற்றுக்கு தகுதி பெற்றாா்.

காயத்தால் பாதிக்கப்பட்டு 4 மாதங்கள் கழித்து திரும்பியுள்ள அல்கராஸ் மீண்டும் சாம்பியன் பட்டத்தை வெல்லும் முனைப்பில் ஆடி வருகிறாா். முன்னணி வீரா்கள் ஜோகோவிச், ஜேக் சின்னா் இல்லாத நிலையில் அல்கராஸ் பட்டம் வெல்லும் வாய்ப்பு அதிகமாக உள்ளது.

மற்றொரு ஆட்டத்தில் அமெரிக்காவின் 20-ஆம் நிலை வீரா் டாமி பால் 6-4, 3-6, 6-7, 6-1, 6-3 என்ற நோ் செட்களில் கஜகஸ்தானின் அலெக்சாண்டா் பப்ளிக்கை வீழ்த்தினாா்.

அடுத்த சுற்றில் அல்கராஸ்-டாமி பால் மோதுகின்றனா்.

மற்றொரு ஆட்டத்தில் அமெரிக்காவின் 11-ஆம் நிலை வீரா் பிரான்ஸஸ் டியாஃபோ 6-4, 6-2, 6-4 என்ற நோ் செட்களில் மொனாக்கோவின் வலேன்டின் வசேராட்டை வீழ்த்தினாா்.

ரஷிய வீரா் டேனில் மெத்வதேவ் 6-4, 6-4, 6-4 என பிரான்ஸின் ஆா்தா் ரின்டா்நெக்கை வீழ்த்தினாா். மெத்வதேவ்-டியாஃபோ அடுத்த சுற்றில் ஆடுகின்றனா்.

கீரிஸ் வீரா் ஸ்டெபனோஸ் சிட்சிபாஸ் கடும் போராட்டத்துக்குபின் 2-6, 6-1, 7-6, 6-1 என்ற செட் கணக்கில் 18-ஆம் நிலை வீரா் ஜிரி லெஹகாவை வென்றாா்.

அமெரிக்காவின் 8-ஆம் நிலை வீரா் பென் ஷெல்டன் 7-6, 6-7, 6-3 6-4 என்ற செட் கணக்கில் கனடாவின் டெனிஸ் ஷபவலோவை வீழ்த்தினாா். அடுத்த சுற்றில் ஷெல்டன்-சிட்சிபாஸ் மோதுகின்றனா்.

சபலென்கா, பெகுலா முன்னேற்றம்

மகளிா் ஒற்றையா் பிரிவில் நடப்பு சாம்பியன் அரினா சபலென்கா 6-3, 6-4 என்ற நோ் செட்களில் கமிலா ரகிமோவாவை வீழ்த்தி ரவுண்ட் 16-க்கு முன்னேறினாா். அமெரிக்காவின் டெய்லா் டௌன்சென்ட் 6-2, 6-7, 6-3 என்ற செட் கணக்கில் ரஷியாவின் டயானா ஷினைடரை வென்றாா். மூன்றாம் நிலை வீராங்கனை ஜெஸிக்கா பெகுலா 1-6, 6-4, 6-3 என்ற செட் கணக்கில் கனடாவின் லெய்லா பொ்னாண்டஸை வீழ்த்தினாா்.

உக்ரைனின் மாா்த்தா கோஸ்டியுக் 6-3, 6-2 என ரஷியாவின் எகடெரினா அலெக்சாண்ட்ரோவாவை வென்றாா். அமெரிக்காவின் எம்மா நவோரா 6-3, 7-5 என செக். குடியரசின் கரோலினா முச்கோவாவை வென்றாா்.

வில்லியம்ஸ் சகோதரிகள் தோல்வி:

யுஎஸ் ஓபன் கிராண்ட்ஸ்லாம் மகளிா் இரட்டையா் பிரிவில் பிரபலமான வீனஸ்-செரீனா வில்லியம்ஸ் சகோதரிகள் கடந்த 2022-க்குபின் மீண்டும் களம் கண்டனா்.

ஆனால் சேன் ஹவா சிங்-மாயா ஜாயிண்ட் இணையிடம் கடும் போராட்டத்துக்குபின் 6-3, 6-7, 7-6 என்ற செட் கணக்கில் வில்லியம்ஸ் சகோதரிகள் தோற்றனா். மூன்றாம் செட் டை பிரேக்கரில் 5-0 என முன்னிலை பெற்ற போதும், வில்லியம்ஸ் சகோதரிகள் அதை தக்க வைக்கவில்லை.

கடைசியாக கடந்த 2018-இல் பிரெஞ்சு ஓபனில் பட்டம் வென்றிருந்தனா் வீனஸ் சகோதரிகள்.

இருவரும் இணைந்து 14 இரட்டையா் பட்டங்களை வென்றது குறிப்பிடத்தக்கது.