வீட்டு சமையல் எரிவாயு சிலிண்டர் விலை ரூ.79 குறைப்பு

சென்னை, தில்லி, மும்பை, கொல்கத்தா உள்பட நாடு முழுவதும் வீட்டு சமையல் எரிவாயுவின் விலை கணிசமாகக் குறைக்கப்பட்டுள்ளது.
சென்னையில் வீட்டு சமையல் எரிவாயு சிலிண்டரின் விலை ரூ.79 குறைக்கப்பட்டு, ரூ.559.50-ஆக நிர்ணயிக்கப்பட்டுள்ளது. சென்னையில் வியாழக்கிழமை (ஜூன் 1) முதல் சமையல் எரிவாயு சிலிண்டருக்கு பதிவு செய்ய உள்ளோர், இந்த குறைக்கப்பட்ட விலையில் சிலிண்டரைப் பெறலாம்.
வீட்டு உபயோகத்துக்கு வழங்கப்படும் மானியம் அல்லாத சிலிண்டரின் விலை கடந்த மே 1-ஆம் தேதி முதல் ரூ.638.50-ஆக இருந்து வந்தது. ஜூன் 1-ஆம் தேதி (வியாழக்கிழமை) முதல் மானியம் அல்லாத சிலிண்டரின் விலை ரூ.559.50-ஆக நிர்ணயிக்கப்பட்டுள்ளது.
வங்கிக் கணக்கில் எவ்வளவு? மானியத்துடன் கூடிய சிலிண்டரின் விலை ரூ.430.27-லிருந்து ரூ.3.88 உயர்த்தப்பட்டு ஜூன் 1-ஆம் தேதி (வியாழக்கிழமை) முதல் ரூ.434.15-ஆக நிர்ணயிக்கப்பட்டுள்ளது. எனவே, ஜூன் 1-ஆம் தேதி முதல் பதிவு செய்து சிலிண்டர் பெறும் வீட்டு சமையல் எரிவாயு நுகர்வோரின் வங்கிக் கணக்கில் மானியமாக ரூ.125.35 செலுத்தப்படும் என்று அதிகாரிகள் தெரிவித்தனர்.