திமுக தலைவா் ஸ்டாலினுக்கு தலைவா்கள் வாழ்த்து

திமுக தலைவராக 2-ஆவது முறையாக தோ்வு செய்யப்பட்டுள்ள மு.க.ஸ்டாலினுக்கு பல்வேறு அரசியல் கட்சித் தலைவா்கள் வாழ்த்து தெரிவித்துள்ளனா்.

தமிழக காங்கிரஸ் தலைவா் கே.எஸ்.அழகிரி: தி.மு.க.வின் தலைவராக கருணாநிதி பொறுப்பேற்று வளா்த்த இயக்கத்தை அவரது மறைவுக்குப் பிறகு சிந்தாமல், சிதறாமல் கட்டுக் கோப்புடன் கம்பீரமாக வழிநடத்தி வரும் மு.க. ஸ்டாலின் மிகுந்த பாராட்டுதலுக்குரியவா்.

பாமக நிறுவனா் மருத்துவா் ச.ராமதாஸ்: திமுகவின் தலைவராக மீண்டும் போட்டியின்றி தோ்ந்தெடுக்கப்பட்டுள்ள ஸ்டாலின் தந்தையைப் போல கட்சியை சிறப்பாக வழி நடத்திச் செல்ல வாழ்த்துகள்.

மதிமுக பொதுச்செயலா் வைகோ: திராவிட இயக்கக் கொள்கைகளை வென்றெடுப்பதில் அடக்குமுறைகளைச் சந்தித்து, பல்வேறு பொறுப்புகளிலும் முதல்வா் மு.க.ஸ்டாலின் வெற்றிகரமாக இயங்கி, மீண்டும் திமுக தலைவராக தோ்வாகிய ஸ்டாலினுக்கு வாழ்த்துக்கள்.

மாா்க்சிஸ்ட் மாநில செயலா் கே.பாலகிருஷ்ணன்: திமுகவில் அடிப்படை உறுப்பினா், கிளை செயலாளா், இளைஞா் அணி செயலாளா், பொருளாளா், முதல்வா் என பல்வேறு பொறுப்புகளில் திறம்பட பணியாற்றி தற்போது இரண்டாம் முறையாக திமுகவின் தலைவராக தோ்வாகியுள்ள ஸ்டாலினுக்கு வாழ்த்துகள்.

இந்திய கம்யூனிஸ்ட் மாநில செயலா் இரா.முத்தரசன்: மதச் சாா்பற்ற, சமூகநீதி சாா்ந்த ஜனநாயக மாற்றை கட்டமைத்து, வெற்றி காண விழைந்து, இரண்டாம் முறையாக திமுக தலைவராக பொறுப்பேற்கும் ஸ்டாலினுக்கு வாழ்த்துக்கள்.

விசிக தலைவா் தொல்.திருமாவளவன்:தமிழ்நாட்டுக்கு மட்டுமின்றி இந்திய நாட்டுக்கே கருத்தியல் அடிப்படையிலான பேரிடா் சூழ்ந்துள்ள நிலையில், திமுக தலைமை பொறுப்பை ஏற்கும் முதல்வா் மு.க.ஸ்டாலினுக்கு, தேசிய அளவில் ’சமூகப் பொறுப்பு’ உருவாகியுள்ளது.

மேலும், தமாகா தலைவா் ஜி.கே. வாசன், திருச்சி மக்களவைத் தொகுதி உறுப்பினா் சு.திருநாவுக்கரசா், தமிழக வாழ்வுரிமை கட்சித் தலைவா் தி.வேல்முருகன், கொங்குநாடு மக்கள் தேசிய கட்சித் தலைவா் ஈ.ஆா்.ஈஸ்வரன், மனிதநேய மக்கள் கட்சித் தலைவா் எம்.ஹெச்.ஜவாஹிருல்லா, திக தலைவா் வீரமணி உள்ளிட்டோரும் வாழ்த்து தெரிவித்துள்ளனா்.