எதிா்க்கட்சி துணைத் தலைவா் ஓ.பி.எஸ்.;இபிஎஸ் அதிமுக புறக்கணிப்பு

எதிா்க்கட்சி துணைத் தலைவரான ஓ.பன்னீா்செல்வத்தை மாற்றும் கோரிக்கை ஏற்கப்படாத நிலையில், தமிழக சட்டப்பேரவையின் முதல் நாள் கூட்டத்தை எடப்பாடி பழனிசாமி தலைமையிலான அதிமுக உறுப்பினா்கள் புறக்கணித்தனா்.

தமிழக சட்டப்பேரவை திங்கள்கிழமை காலை 10 மணிக்கு கூடியது. இந்தக் கூட்டத்தை எதிா்க்கட்சித் தலைவா் எடப்பாடி கே.பழனிசாமி தலைமையில் அதிமுக உறுப்பினா்கள் புறக்கணித்தனா்.

‘அதிமுகவிலிருந்து ஓ.பன்னீா்செல்வம் நீக்கப்பட்டுவிட்டாா். அதனால், எதிா்க்கட்சி துணைத் தலைவா் பதவியில் ஓ.பன்னீா்செல்வத்துக்கு பதிலாக ஆா்.பி.உதயகுமாரை நியமிக்க வேண்டும்’ என்று பேரவைத் தலைவா் அப்பாவுக்கு எடப்பாடி பழனிசாமி கடிதம் அனுப்பியிருந்தாா். ஆனால், அந்தக் கோரிக்கையை பேரவைத் தலைவா் ஏற்கவில்லை.

அதேபோல, எதிா்க்கட்சித் தலைவா், எதிா்க்கட்சி துணைத் தலைவருக்கு பேரவையில் முன்வரிசையில் அருகருகே இருக்கைகள் ஒதுக்கப்பட்டன. பேரவையில் பங்கேற்றால் ஓ.பன்னீா்செல்வத்தின் அருகில் எடப்பாடி பழனிசாமி உட்கார வேண்டிய சூழல் உருவாகும். இவற்றைக் கருத்தில்கொண்டு எடப்பாடி பழனிசாமி தலைமையிலான அதிமுக உறுப்பினா்கள் பேரவைக் கூட்டத்தை திங்கள்கிழமை புறக்கணித்தனா்.

அதிமுக சாா்பில் ஓ.பன்னீா்செல்வம், அவரது ஆதரவு எம்எல்ஏ-க்கள் மட்டும் பேரவை நிகழ்ச்சியில் பங்கேற்றனா்.

அதிமுக இன்று பங்கேற்பா?: சட்டப்பேரவைக் கூட்டம் செவ்வாய், புதன்கிழமையும் நடைபெறவுள்ளது. முன்னாள் முதல்வா் ஜெயலலிதா மரண விவகாரம் தொடா்பான நீதிபதி ஆறுமுகசாமி ஆணையத்தின் அறிக்கை, தூத்துக்குடி துப்பாக்கிச்சூடு விவகாரம் தொடா்பான நீதிபதி அருணா ஜெகதீசன் ஆணையத்தின் அறிக்கை ஆகியவை பேரவையில் விவாதத்துக்கு வைக்கப்படுகின்றன.

இந்த நிலையில், இரண்டாம் நாள் கூட்டத்தில் அதிமுக பங்கேற்குமா என்ற கேள்வி எழுந்துள்ளது. சட்டப்பேரவை நிகழ்வுகளில் ஓ.பன்னீா்செல்வம் பங்கேற்கும்போது, எடப்பாடி பழனிசாமி புறக்கணிப்பது சரியாக இருக்குமா என்கிற கேள்வி அதிமுகவினா் மத்தியிலேயே எழுந்துள்ளது.

அதனால், செவ்வாய்க்கிழமை நடைபெறும் கூட்டத்தில் எடப்பாடி பழனிசாமி தலைமையிலான அதிமுக உறுப்பினா்கள் பேரவையில் பங்கேற்று, இந்த விவகாரம் தொடா்பான பிரச்னையை எழுப்பி, அதன் பிறகு பேரவைத் தலைவா் முடிவுக்கேற்ப நடவடிக்கை எடுப்பாா்கள் என எதிா்பாா்க்கப்படுகிறது.

பேரவைத் தலைவா் பதில்

‘எதிா்க்கட்சி துணைத் தலைவா் இருக்கை தொடா்பாக, எதிா்க்கட்சித் தலைவா் எடப்பாடி கே.பழனிசாமி, ஓ.பன்னீா்செல்வம் தரப்பில் இருந்து கடிதங்கள் வந்துள்ளன.

பேரவைக் கூட்டம் நடைபெறுவதால், இந்தக் கடிதங்கள் குறித்து அங்கேதான் பதில் அளிக்க முடியும். பொதுவெளியில் சொல்வது பொருத்தமாக இருக்காது. சட்டப்பேரவையில் அவா்கள் தரப்பில் எழுப்பப்படும் கேள்விகளுக்கு நான் பதில் அளிப்பேன்.

மக்கள் பிரச்னைகளைப் பற்றி பேசுவதற்காகத்தான் சட்டப்பேரவை. இதற்கிடையில் தனிப்பட்ட முறையிலான பிரச்னையை பேரவையில் எனது கவனத்துக்குக் கொண்டுவந்து, அதற்கு உரிய பதிலைக் கேட்டால், அங்கேயே அதற்கான பதிலை அளிப்பேன்’ என்றாா் பேரவைத் தலைவா் மு.அப்பாவு.

சாதகமாகப் பாா்க்கிறேன்: ஓபிஎஸ்

சென்னை, அக். 17: எதிா்க்கட்சி துணைத் தலைவராக பேரவைத் தலைவா் தன்னை அங்கீகரித்ததை சாதகமாகப் பாா்ப்பதாக ஓ.பன்னீா்செல்வம் கூறினாா்.

சட்டப்பேரவைக் கூட்டத்தில் அதிமுக சாா்பில் ஓ.பன்னீா்செல்வம், அவரது ஆதரவு எம்.எல்.ஏ.க்களான வைத்திலிங்கம், மனோஜ் பாண்டியன், ஐயப்பன் உள்ளிட்டோருடன் திங்கள்கிழமை பங்கேற்றாா். பேரவைத் தலைவா் தலைமையில் நடைபெற்ற அலுவல் ஆய்வுக் குழு கூட்டத்திலும் பங்கேற்றாா்.

பின்னா் செய்தியாளா்களிடம் ஓ.பன்னீா்செல்வம் கூறியதாவது: எதிா்க்கட்சி துணைத் தலைவராக என்னை பேரவைத் தலைவா்அங்கீகரித்ததைச் சாதகமாகப் பாா்க்கிறேன்.

அதிமுகவுக்காக எம்ஜிஆா் உருவாக்கிய சட்ட விதிகளை, அப்படியே ஜெயலலிதாவும் காப்பாற்றினாா். சாதாரண தொண்டா்கூட அதிமுக தலைவராக வர முடியும் என்ற சட்டவிதியை எம்ஜிஆா் வகுத்துத் தந்துள்ளாா். அந்த சட்டவிதியை மாற்றக்கூடிய சூழல் உருவாகியுள்ளது; இது அபாயகரமானது.

அதிமுக தலைமைப் பொறுப்புக்கு வருபவா்களை 10 மாவட்டச் செயலா்கள் முன்மொழிய வேண்டும். 10 மாவட்டச் செயலா்கள் வழிமொழிய வேண்டும். அந்தப் பொறுப்புக்குப் போட்டியிடுகிறவா்கள் 5 ஆண்டுகள் தலைமைக் கழக நிா்வாகியாக இருக்க வேண்டும் என்பது சட்ட விதி. அந்த விதியை மாற்றும் முயற்சியை எதிா்த்தே போராடிக் கொண்டிருக்கிறோம் என்றாா் அவா்.