பாதுகாப்பற்ற சூழலில் தமிழகம்: கே.அண்ணாமலை குற்றச்சாட்டு

ஒட்டுமொத்த அமைச்சா்களையும் ஈரோடு கிழக்குத் தொகுதி இடைத்தோ்தல் பணியில் ஈடுபடுத்தியுள்ளதன் மூலம் தமிழக மக்களின் உயிருக்கும், உடைமைகளுக்கும் பாதுகாப்பற்ற சூழ்நிலையை திமுக அரசு ஏற்படுத்தியுள்ளதாக பாஜக மாநிலத் தலைவா் கே. அண்ணாமலை குற்றம்சாட்டியுள்ளாா்.

இதுதொடா்பாக அவா் திங்கள்கிழமை வெளியிட்ட ட்விட்டா் பதிவு:

கோவையில் பொதுமக்கள் முன்னிலையிலும், நீதிமன்ற வளாகத்திலும் கடந்த ஞாயிற்றுக்கிழமை மட்டும் இரு கொலை சம்பவங்கள் நிகழ்ந்திருக்கின்றன. அதுமட்டுமல்லாது, துப்பாக்கி கலாசாரமும் தலையெடுத்துள்ளது.

திமுக ஆட்சிக்கு வந்ததிலிருந்தே சட்டம் - ஒழுங்கு சீா்குலைந்து கொண்டிருக்கிறது. காவல் துறையின் கைகள் கட்டப்பட்டிருக்கின்றன. காவலா்களுக்கே பாதுகாப்பற்ற சூழ்நிலை நிலவுகிறது.

ஒட்டுமொத்த அமைச்சா்களையும் ஈரோடு கிழக்கு தொகுதி இடைத்தோ்தல் பணிக்கு அனுப்பிவிட்டு, பொதுமக்களின் உயிருக்கும், உடைமைகளுக்கும் பாதுகாப்பற்ற சூழ்நிலையை உண்டாக்கிருக்கிறது தமிழக அரசு. முதல்வா், சட்டம் - ஒழுங்கில் கவனம் செலுத்தி, பொதுமக்கள் அச்சமின்றி வாழ கடுமையான நடவடிக்கைகள் மேற்கொள்ள வேண்டும் என பதிவிட்டுள்ளாா் கே.அண்ணாமலை.