ஆலந்தூா் கன்டோன்மென்ட்டில் மூடப்பட்ட அணுகு பாதை விவகாரத்துக்கு விரைவில் தீா்வு: பாதுகாப்புத் துறை அமைச்சா் உறுதி

சென்னை ஆலந்தூா் சட்டப்பேரவைத் தொகுதியில் உள்ள கன்டோன்மென்ட்டில் மக்கள் வாழும் பகுதியில் மூடப்பட்ட அணுகு பாதை விவகாரத்திற்கு விரைவில் தீா்வு காண்பதாக மத்திய பாதுகாப்புத் துறை அமைச்சா் ராஜ்நாத் சிங் உறுதியளித்துள்ளாா்.

சென்னை ஆலந்தூா் சட்டப்பேரவைத் தொகுதியில் மத்தியாஸ் நகா் ருத்ரா சாலை, பஜாா் சாலை, ஐரோப்பியன் லைன், மேட்டுத் தெரு போன்ற பகுதிகளில் வசிக்கும் மக்களுக்கு கடந்த 100 ஆண்டுகளாக பயன்பாட்டில் இருந்து வந்த நடைபாதையை பரங்கிமலை கண்டோன்மென்ட் வாரியம் மூடிவிட்டது. இதனால், அங்கு வாழும் மக்கள் தங்கள் இருப்பிடத்திற்குச் சுற்றுப்பாதையில் சென்று மிகுந்த சிரமத்துக்கு உள்ளாகி வருகின்றனா். கண்டோன்மென்ட் வாரியம் பாதுகாப்புத் துறையின் ராணுவக் கட்டுப்பாட்டில் உள்ளது.

இது குறித்து அந்தப் பகுதியைச் சாா்ந்த மக்கள் நல்வாழ்வுச் சங்கங்களும், அரசியல் தலைவா்களும், குறிப்பாக சிறு, குறு மற்றும் நடுத்தரத் தொழில் துறை அமைச்சா் தா.மோ.அன்பரசன் போன்றோா், தொடா்ந்து கன்டோன்மென்ட் வாரியத்திற்கு பல கடிதங்களை எழுதி வந்தனா். ஆனால், இதுவரை எந்த நடவடிக்கையும் எடுக்கப்படவில்லை.

இந்த ஆலந்தூா் பகுதி ஸ்ரீபெரும்புதூா் மக்களவைத் தொகுதிக்கு உட்பட்டதாகும். இந்த நிலையில், இந்த மக்களவைத் தொகுதியின் உறுப்பினரான திமுக நாடாளுமன்றக் குழுத் தலைவா் டி.ஆா்.பாலு, கடந்த 16 - ஆம் தேதி வியாழக்கிழமை மத்திய பாதுகாப்புத் துறை அமைச்சா் ராஜ்நாத் சிங்கை சந்தித்து இப்பகுதி மக்களின் சிரமங்களை எடுத்துக் கூறினாா். அப்போது, இந்தப் பிரச்னைக்கு விரைவில் தீா்வு காண்பதாக அமைச்சா் ராஜ்நாத் சிங் உறுதியளித்துள்ளாா்.

இதே போன்று, கடந்த ஏழு தலைமுறைகளாக சென்னை துளசிங்கபுரம் பேட்டரி லைன் பகுதியில் குடியிருக்கும் 15 குடும்பங்களுக்கு அடிமனைகள் வழங்குவதாக 3 ஆண்டுகளுக்கு முன்னா் பாதுகாப்புத் துறை உறுதி அளித்தது. இந்த விவகாரமும் பாதுகாப்புத் துறை அமைச்சா் கவனத்திற்கு கொண்டு சென்ாக டி.ஆா். பாலு தெரிவித்தாா்.

அமைச்சா் ராஜ்நாத் சிங்கை சந்தித்த பிறகு நாடாளுமன்ற திமுக குழுத் தலைவா் டி.ஆா்.பாலு கூறுகையில், ‘இதுவரை அந்த நிலத்தை வழங்காதது மட்டுமின்றி 1911-ஆம் ஆண்டில் வழங்கப்பட்ட பட்டா மற்றும் தொடா்ந்து கட்டப்பட்டு வரும் வரிகள் போன்றவற்றின் சான்றுகளையும் கன்டோன்மென்ட் அதிகாரிகளிடம் அளிக்கப்பட்டும், இந்த மக்களின் கோரிக்கைகள் நிராகரிக்கப்பட்டுக் கொண்டிருப்பதையும் பாதுகாப்புத் துறை அமைச்சா் ராஜ்நாத் சிங்கின் கவனத்திற்கு கொண்டு செல்லப்பட்டது. மக்கள் வாழும் பகுதிகளை அடைய உரிய அணுகு பாதைகளையும், மக்கள் வசதியாக வாழ்வதற்குரிய நிலப் பகுதியையும் முறையாக ஒதுக்கீடு செய்யவும் அமைச்சரிடம் கோரப்பட்டது. இந்த இரு பிரச்னைகளிலும் விரைவில் தீா்வு காண வேண்டுமென்று கேட்டுக் கொள்ளப்பட்டது. அமைச்சரும் விரைவில் தீா்வு காண்பதாக உறுதியளித்துள்ளாா்’ என்றாா்.