சென்னையில் பிரபல வணிக வளாகத்துக்கு வெடிகுண்டு மிரட்டல்: தொடரும் புரளி?

சென்னையில் பிரபல வணிக வளாகத்துக்கு மின்னஞ்சல் மூலம் வெடிகுண்டு மிரட்டல் விடுக்கப்பட்டதால் பரபரப்பு ஏற்பட்டது.

சென்னை திருமங்கலத்தில் பிரபல தனியார் வணிக வளாகம் ஒன்று செயல்பட்டு வருகிறது. இந்த தனியார் வணிக வளாகத்தில் தினந்தோறும் ஆயிரத்துக்கும் மேற்பட்டோர் வந்து செல்வார்கள்.

அதே போல் இன்றும் அந்த தனியார் வணிக வளாகத்துக்கு 1000க்கும் மேற்பட்ட மக்கள் வருகை தந்து இருந்தனர். இந்தநிலையில் இன்று காவல் கட்டுப்பாட்டு அறைக்கு அந்த தனியார் விடுதியில் வெடிகுண்டு வைக்கப்பட்டு இருப்பதாக இமெயில் மூலம் மிரட்டல் வந்துள்ளது.

அதன் அடிப்படையில் கோயம்பேடு காவல்துறையினர் சம்பவ இடத்திற்கு சென்று விசாரனை மேற்கொண்டனர். மேலும் வெடிகுண்டு நிபுணர்கள் மோப்ப நாய் உதவியுடன் வணிக வளாகம் முழுவதும் தீவிர சோதனையில் ஈடுபட்டனர்.

வணிக வளாகத்துக்குள் இருந்த மக்களை பாதுகாப்பாக காவல்துறையினர் வெளியேற்றினர். வணிக வளாகத்தில் இருக்கும் உணவகம், திரையரங்கம் உள்ளிட்ட அனைத்து இடங்களிலும் மோப்பநாய் உதவியுடன் சோதனை நடத்தப்பட்டது.

ஏற்கனவே சென்னையில் தனியார் பள்ளிகள் மற்றும் கோவிலுக்கு வெடிகுண்டு மிரட்டல் இமெயில் மூலம் விடுக்கப்பட்ட சம்பவம் பெரும் பரபரப்பை ஏற்படுத்தியிருந்தது. விசாரணையில் அந்த மிரட்டல் சம்பவங்கள் புரளி என்பது கண்டுபிடிக்கப்பட்டது.

தொடர்ந்து மின்னஞ்சல் மூலம் வெடிகுண்டு மிரட்டல் விடும் நபர்கள் குறித்து தொடர்ந்து குறித்து காவல்துறையினர் விசாரணை மேற்கொண்டு வருகின்றனர். இந்த நிலையில் தான் சென்னையில் பிரபல தனியார் வணிக வளாகத்துக்கு வெடிகுண்டு மிரட்டல் விடுக்கப்பட்டது பரபரப்பை ஏற்படுத்தியிருக்கிறது.

நவீன தொழில்நுட்பங்கள் வளர்ந்துவரும் நிலையில், இதுவரை வெடிகுண்டு மிரட்டல் அனுப்பியவரைப் பற்றிய தகவல்கள் கிடைக்கப்பெறாதது மக்களிடையே அதிருப்தியை ஏற்படுத்தியிருப்பதாகவும் கூறப்படுகிறது.