சிறைத் துறை அதிகாரிகள் வீட்டில் கைதிகள் வேலை செய்ய வைக்கப்பட்டுள்ளாா்களா?

சென்னை: தமிழக சிறைத் துறை அதிகாரிகள் வீட்டில் கைதிகள் வேலை செய்ய வைக்கப்பட்டுள்ளாா்களா? என சிபிசிஐடி அதிகாரிகள் ரகசிய விசாரணை மேற்கொண்டு வருகின்றனா்.

கிருஷ்ணகிரி மாவட்டம், மாணிக்கம் கோட்டை பகுதியைச் சோ்ந்த சிவக்குமாா், ஒரு குற்ற வழக்கில் ஆயுள் தண்டனை பெற்று, அதை வேலூா் மத்திய சிறையில் அடைப்பட்டுள்ளாா். விதிமுறைகளை மீறி சிறைத் துறை வேலூா் சரக டிஐஜி ராஜலட்சுமி தனது வீட்டு வேலைக்கு பயன்படுத்தியதாகவும் அவரது வீட்டில் ரூ.4.25 லட்சம் திருடியதாக சிவக்குமாரை 95 நாள்கள் அடைத்து வைத்து சித்ரவதை செய்ததாகவும் புகாா் கூறப்பட்டது.

இது தொடா்பாக சிவக்குமாரின் தாயாா் கலாவதி, சென்னை உயா்நீதிமன்றத்தில் தாக்கல் செய்த மனுவை விசாரித்த சென்னை உயா்நீதிமன்றம், டிஐஜி ராஜலட்சுமி, வேலூா் மத்திய சிறை கூடுதல் காவல் கண்காணிப்பாளா்அப்துல் ரஹ்மான் உள்பட 14 போ் மீது சிபிசிஐடி வழக்குப் பதிவு செய்து, அதிகாரிகள் வீடுகளில் கைதிகள் வேலைக்கு பயன்படுத்தப்படுகின்றனரா என்பதை தமிழக காவல் துறை தலைமை இயக்குநா் கண்காணித்து நடவடிக்கை எடுக்க வேண்டும்; சிறைக் காவலா்கள், அதிகாரிகள் வீடுகளில் வேலைக்கு ஈடுபடுத்தப்படுவதைத் தடுக்க நடவடிக்கை எடுக்க வேண்டும் என்றும் அண்மையில் உத்தரவிட்டது.

சிபிசிஐடி ரகசிய விசாரணை: இந்த உத்தரவின் அடிப்படையில் நடவடிக்கை எடுக்கும்படி தமிழக காவல் துறை தலைமை இயக்குநா் சங்கா் ஜிவால், சிபிசிஐடி-க்கு உத்தரவிட்டாா். இதையடுத்து சிபிசிஐடி அதிகாரிகள், தமிழகம் முழுவதும் சிறைத் துறை அதிகாரிகள் வீடுகளை ரகசியமாக கண்காணித்து வருகின்றனா்.

குறிப்பாக, சென்னை, வேலூா், திருச்சி, கோயம்புத்தூா், மதுரை, திருநெல்வேலி ஆகிய மாவட்டங்களில் உள்ள சிறைத் துறை அதிகாரிகள் வீடுகள் இருக்கும் பகுதிகளில் சிபிசிஐடி அதிகாரிகள் தொடா்ந்து ரகசிய விசாரணையில் ஈடுபட்டு வருகின்றனா்.

சந்தேகத்துக்குரிய சிறைத் துறை அதிகாரிகளின் வீடுகளிலும் சிபிசிஐடி அதிகாரிகள் விரைவில் சோதனை நடத்த திட்டமிட்டுள்ளதாக தகவல் வெளியாகியுள்ளது.