பாஜக வேட்பாளர் பட்டியல் வெளியீடு! அண்ணாமலை?

தமிழக சட்டப்பேரவைத் தேர்தலில், அதிமுக கூட்டணியில் இடம்பெற்றுள்ள பாஜக போட்டியிடும் தொகுதிகளுக்கான வேட்பாளர்கள் பட்டியல் வெளியிடப்பட்டுள்ளது.

அதிமுக தலைமையிலான தேசிய ஜனநாயகக் கூட்டணியில் போட்டியிடும் பாஜகவுக்கு 27 தொகுதிகள் ஒதுக்கப்பட்டுள்ளன. கடந்த திங்கள்கிழமையே வேட்புமனு தாக்கல் தொடங்கி ஏப். 6ஆம் தேதி வேட்பு மனு தாக்கலுக்கு கடைசி நாள்.

இதற்கிடையே, பாஜகவின் வேட்பாளர் பட்டியல் வெளியிடுவதில் தாமதம் ஏற்பட்டு வந்த நிலையில், பாஜக சார்பில் இன்று வேட்பாளர்கள் பட்டியல் வெளியிடப்பட்டுள்ளது. அண்ணாமலை போட்டியிடும் தொகுதிதான் இழுபறியாக இருந்து வந்ததாகக் கூறப்பட்டு வந்த நிலையில், அவரது பெயர் வேட்பாளர் பட்டியலில் இடம்பெறவில்லை.

பாஜக மாநிலத் தலைவர் நயினார் நாகேந்திரன் சாத்துர் தொகுதியில், அவிநாசியில் மத்திய இணையமைச்சர் எல். முருகன், மயிலாப்பூரில் முன்னாள் ஆளுநரும் பாஜக மூத்த தலைவருமான தமிழிசை, கோவை வடக்கில் எம்.எல்.ஏ. வானதி சீனிவாசன் போட்டியிடுகிறார்கள்.

காங்கிரஸ் கட்சியிலிருந்து விலகி, பாஜகவில் இணைந்து, நீண்ட காலமாக பதவிக்காகக் காத்திருந்த விஜயதரணிக்கு, விளவங்கோடு தொகுதியில் போட்டியிட பாஜக சார்பில் வாய்ப்பு வழங்கப்பட்டுள்ளது.

பாஜக வேட்பாளர் பட்டியல்: ஆவடி - ராஜசிம்ம மகிந்திரா, மயிலாப்பூர் - தமிழிசை சௌந்தரராஜன், தளி - டாக்டர் நாகேஷ் குமார், திருவண்ணாமலை - சி. ஏழுமலை, ராசிபுரம் (தனி) - டாக்டர் எஸ்டி பிரேம்குமார், மொடக்குறிச்சி - கிருத்திகா சிவக்குமார், உதகை - போஜ ராஜன், அவிநாசி (தனி) - எல். முருகன், திருப்பூர் தெற்கு - தங்கராஜ், கோவை வடக்கு - வானதி சீனிவாசன், திருவாரூர் - கோவி சந்துர், தஞ்சை - எம். முருகானந்தம் ஆகியோர் போட்டியிடுவார்கள் என்று அறிவிக்கப்பட்டுள்ளது.

மேலும், கந்தர்வக்கோட்டை - உதயகுமார், புதுக்கோட்டை - ராமச்சந்திரன், அறந்தாங்கி - கவிதா ஸ்ரீகாந்த், திருப்பத்தூர் - கே.சி. திருமாறன், மானாமதுரை - பால கணபதி, மதுரை தெற்கு - ராம சீனிவாசன், சாத்தூர் - நயினார் நாகேந்திரன், ராமநாதபுரம் - கே. நாகேந்திரன், திருச்செந்தூர் - கேஆர்எம் ராதாகிருஷ்ணன், வாசுதேவநல்லூர் (தனி) - ஆனந்தன் ஐயாசாமி, ராதாபுரம் - பாலகிருஷ்ணன், நாகர்கோயில் - எம்.ஆர். காந்தி, கொளச்சல் - டி. சிவக்குமார், பத்மநாபபுரம் - பி. ரமேஷ், விளவங்கோடு - எஸ். விஜயதாரணி ஆகியோர் பாஜக சார்பில் போட்டியிடுவார்கள் என்று பட்டியலில் தெரிவிக்கப்பட்டுள்ளது.

இழுபறிக்குக் காரணம் அண்ணாமலைதானா?

அதிகம் எதிர்பார்க்கப்பட்டு வந்த பாஜக வேட்பாளர் பட்டியல் வெளியாகியிருக்கிறது. பட்டியல் தயாரிப்புப் பணி நடைபெற்று வந்த போது, கோவை வடக்கு சட்டப்பேரவைத் தொகுதியில் போட்டியிட அண்ணாமலை விருப்பம் தெரிவித்திருந்ததாகவும், ஆனால், அந்த தொகுதி வானதி சீனிவாசனுக்கு ஒதுக்க கட்சித் தலைமை முடிவெடுத்திருந்ததாகவும் கூறப்பட்டது.

பிறகு, அண்ணாமலையை மொடக்குறிச்சி தொகுதியில் போட்டியிட கட்சித் தலைமை வலியுறுத்தி வந்ததாகவும், ஆனால், கோவை வடக்கு தொகுதி கிடைக்கவில்லை என்றால் தேர்தலில் போட்டியிட மாட்டேன் என்று அண்ணாமலை திட்டவட்டமாக தெரிவித்துவிட்டதாக தகவல்கள் வெளியாகின. இது தொடர்பான பேச்சுவார்த்தையால்தான் வேட்பாளர் பட்டியல் வெளியாகவில்லை என்று கூறப்பட்டு வந்த நிலையில், அண்ணாமலை நிச்சயம் தேர்தலில் போட்டியிடுவார் என்று கூறப்பட்டது. ஆனால், இன்று வெளியான பாஜக வேட்பாளர் பட்டியலில் அதிகம் எதிர்பார்க்கப்பட்ட அண்ணாமலையின் பெயர் இடம்பெறவில்லை. இது அண்ணாமலை ஆதரவாளர்களுக்கு கடும் அதிர்ச்சியை ஏற்படுத்தியிருக்கிறது.

பாஜக தமிழ்நாடு எக்ஸ் பக்கத்தில், வேட்பாளர் பட்டியல் வெளியடப்பட்டுள்ளது.