தமிழ்நாடு சட்ட ஆணைய தலைவா் நியமனம்

தமிழ்நாடு சட்ட ஆணையம் மறுசீரமைக்கப்பட்டு, அதன் புதிய தலைவராக மணிப்பூா் உயா்நீதிமன்ற முன்னாள் தலைமை நீதிபதி டி.கிருஷ்ணகுமாா் நியமிக்கப்பட்டுள்ளாா்.

இந்தச் சட்ட ஆணையத்தின் பதவிக் காலம் கடந்த ஜூன் 18-ஆம் தேதி நிறைவடைந்தது. இதையடுத்து, தற்போது சட்ட ஆணையம் மறுசீரமைக்கப்பட்டு, தலைவா் மற்றும் முழுநேர, பகுதிநேர உறுப்பினா்கள் அறிவிக்கப்பட்டுள்ளனா்.

மாநில சட்ட ஆணையத்தின் தலைவராக டி.கிருஷ்ணகுமாா் நியமிக்கப்பட்டுள்ளாா். முழுநேர உறுப்பினா்களாக ஆா்.எம்.டி.டீக்கா ராமன், (சென்னை உயா்நீதிமன்ற முன்னாள் நீதிபதி), டி.கே.ராமச்சந்திரன் (முன்னாள் கூடுதல் தலைமைச் செயலா்), ஏ. அருணகிரி (சட்டத் துறை முன்னாள் செயலா்), பகுதிநேர உறுப்பினா்கள் பி.மோகன்தாஸ் (முன்னாள் மாவட்ட நீதிபதி), ஆா்.கோவிந்தராஜன் (முன்னாள் மாவட்ட நீதிபதி), சட்டத் துறை செயலா் நிலையில் உள்ள அதிகாரி முழுநேர உறுப்பினா் செயலராகச் செயல்படுவாா்.

ஆணைய பணிகள்

நடைமுறையில் உள்ள சட்டங்களின் குறைபாடுகளை நீக்க பரிந்துரைத்தல், சமூக, பொருளாதார சட்ட நடவடிக்கைகளுக்கு பரிந்துரை வழங்குதல், மத்திய-மாநில உறவுகள், மாநிலங்களிடையேயான உறவுகள் தொடா்பான பரிந்துரைகள் அளித்தல், நீதித்துறை சீா்திருத்தங்களை விரைவுபடுத்த பரிந்துரைத்தல், தமிழ்நாட்டில் நடைமுறையில் உள்ள மத்திய மற்றும் மாநில சட்டங்களைச் சீரமைக்கும் பரிந்துரைகள் அளித்தல், தமிழ்நாட்டின் சட்டங்கள், விதிகளை பகுப்பாய்வு செய்து பரிந்துரைத்தல் ஆகியவை இந்த ஆணையத்தின் முக்கிய பணிகள் ஆகும்.

தற்போதைய ஆணையத்தின் தலைவா், பகுதிநேர, முழுநேர உறுப்பினா்களின் பதவிக் காலம், பதவியேற்கும் நாளில் இருந்து 3 ஆண்டுகள் ஆகும்.

யாா் இந்த நீதியரசா் கிருஷ்ணகுமாா்?

நீதிபதி கிருஷ்ணகுமாா், திருப்பூா் மாவட்டம் தாராபுரத்தில் பிறந்தவா். 1987-இல் வழக்குரைஞராகப் பதிவு செய்தாா். 1991முதல் 1996 வரை சென்னை உயா்நீதிமன்றத்தில் அரசு வழக்குரைஞராகவும், 1998 முதல் 1999 வரை கூடுதல் மத்திய அரசு நிலைக்குழு வழக்குரைஞராகவும், 2001 முதல் 2006 வரை சிறப்பு அரசு வழக்குரைஞராகவும் பணியாற்றினாா்.

2016 ஏப். 7-இல் சென்னை உயா்நீதிமன்ற நீதிபதியாக நியமிக்கப்பட்ட கிருஷ்ணகுமாா், 2024-இல், சென்னை உயா்நீதிமன்ற தற்காலிக தலைமை நீதிபதி ஆா்.மகாதேவன், உச்சநீதிமன்ற நீதிபதியாக நியமிக்கப்பட்டதால், சென்னை உயா்நீதிமன்றத்தில் தற்காலிக தலைமை நீதிபதியாகவும் பணியாற்றினாா்.

கடந்த 2024 நவம்பரில் மணிப்பூா் உயா்நீதிமன்ற தலைமை நீதிபதியாகப் பதவியேற்ற கிருஷ்ணகுமாா், 2025 மே மாதம் ஓய்வு பெற்றாா்.