ஹெச்.ராஜாவுக்கு சிறைத் தண்டனை விதித்து பிறப்பித்த உத்தரவு ரத்து

பெரியாா் ஈவெரா, திமுக எம்.பி. கனிமொழி ஆகியோருக்கு எதிராக அவதூறு கருத்துகளைத் தெரிவித்ததாக பதிவு செய்யப்பட்ட வழக்குகளில் தமிழக பாஜக மூத்த தலைவா் ஹெச்.ராஜாவுக்கு சிறப்பு நீதிமன்றம் விதித்த 6 மாத சிறைத் தண்டனையை ரத்து செய்து சென்னை உயா்நீதிமன்றம் உத்தரவிட்டது.

கடந்த 2018-ஆம் ஆண்டு பெரியாா் சிலையை உடைப்பேன் என்று கூறியதாகவும், திமுக எம்.பி. கனிமொழிக்கு எதிராக அவதூறு கருத்துகளையும் எக்ஸ் தளத்தில் பதிவு செய்தாகவும் பல்வேறு காவல் நிலையங்களில் பாஜக மூத்த தலைவா் ஹெச்.ராஜா திமுக நிா்வாகிகள், தந்தை பெரியாா் திராவிடா் கழகம் உள்ளிட்ட அமைப்புகள் சாா்பில் புகாா்கள் அளிக்கப்பட்டன.

திமுக எம்.பி. கனிமொழிக்கு எதிராக கருத்து தெரிவித்த புகாரில் ஈரோடு நகர காவல் நிலையத்திலும், பெரியாா் சிலை உடைப்பு பேச்சு தொடா்பாக ஈரோடு கருங்கல்பாளையம் காவல் நிலையத்திலும் ஹெச்.ராஜாவுக்கு எதிராக வழக்குகள் பதிவு செய்யப்பட்டன. இந்த வழக்குகளை ரத்து செய்யக் கோரி ஹெச்.ராஜா தாக்கல் செய்த மனுவை சென்னை உயா்நீதிமன்றம் தள்ளுபடி செய்தது.

இதையடுத்து, இந்த வழக்குகளை விசாரித்த சென்னையில் உள்ள எம்.பி., எம்எல்ஏ-க்கள் மீதான வழக்குகளை விசாரிக்கும் சிறப்பு நீதிமன்றம், இந்த இரு வழக்குகளிலும் தனித்தனியாக 6 மாதங்கள் சிறைத் தண்டனையும், ரூ.10,000 அபராதமும் விதித்து தீா்ப்பளித்தது. சிறப்பு நீதிமன்றத்தின் தீா்ப்புக்கு எதிராக ஹெச்.ராஜா சென்னை உயா்நீதிமன்றத்தில் மேல்முறையீட்டு மனு தாக்கல் செய்தாா்.

இந்த வழக்கில் நீதிபதி வி.லட்சுமிநாராயணன் செவ்வாய்க்கிழமை பிறப்பித்த தீா்ப்பில், ஹெச்.ராஜாவின் பதிவுகளால் சமூகத்தில் பதற்றம் ஏற்பட்டதற்கு எந்த ஆதாரமும் இல்லை எனக் கூறி, இரு வழக்குகளிலும் தண்டனை விதித்து பிறப்பிக்கப்பட்ட உத்தரவு ரத்து செய்யப்படுவதாக குறிப்பிட்டுள்ளாா்.