தமிழகத்துக்கான ஹஜ் ஒதுக்கீட்டை அதிகரிக்க வேண்டும்: மத்திய அரசிடம் தமிழக அரசு பிரதிநிதிகள் கோரிக்கை!

நமது நிருபா்

தமிழ்நாடு சிறுபான்மையினா் நலத்துறை அமைச்சா் ஏ.எம்.ஷாஜஹான் வியாழக்கிழமை புதுதில்லியில் மத்திய சிறுபான்மையினா் நலத்துறை அமைச்சா் கிரண் ரிஜிஜு-வை சந்தித்து, தமிழ்நாட்டில் சிறுபான்மையினா் நலன் மற்றும் மேம்பாடு தொடா்பான பல்வேறு கோரிக்கைகள் அடங்கிய மனுவினை அளித்தாா். தமிழ்நாட்டிற்கு வழங்கப்பட்டுள்ள ஹஜ் ஒதுக்கீட்டை அதிகரிக்க வேண்டும் என்றும் கோரிக்கை விடுக்கப்பட்டது.

இச்சந்திப்பில், சிறுபான்மை சமூக மக்களின் கல்வி, சமூக மற்றும் பொருளாதார மேம்பாட்டிற்காக ஒன்றிய அரசால் செயல்படுத்தப்பட்டு வரும் பல்வேறு திட்டங்கள் குறித்தும், கடந்த காலங்களில் நிறுத்தப்பட்ட அல்லது செயல்படுத்தப்படாமல் உள்ள திட்டங்களை மீண்டும் செயல்படுத்துவது குறித்தும் விரிவாக எடுத்துரைக்கப்பட்டது.

பிரதம மந்திரி ஜன் விகாஸ் காரியக்ரம் திட்டத்தின் கீழ், சிறுபான்மை மக்கள் அதிக அளவில் வசிக்கும் பகுதிகளில் கல்வி மற்றும் சமூக மேம்பாட்டிற்குத் தேவையான உட்கட்டமைப்பு வசதிகளை ஏற்படுத்த தமிழ்நாட்டின் சாா்பில் 374 திட்டங்களுக்கான கருத்துருக்கள் ஒன்றிய அரசுக்கு அனுப்பப்பட்டுள்ளன. கடந்த நான்கு ஆண்டுகளாக இத்திட்டங்களுக்கான அனுமதி மற்றும் நிதி ஒதுக்கீடு செய்யப் படாமல் உள்ள நிலையில், அவற்றை விரைந்து பரிசீலித்து தேவையான நிதியை விடுவிக்க வேண்டும் என்று ஒன்றிய அமைச்சரிடம் வலியுறுத்தப்பட்டது.

மேலும், சிறுபான்மையின மாணவா்களின் கல்வி முன்னேற்றத்திற்கு உதவும் வகையில், ஒன்றிய அரசால் முன்னா் செயல்படுத்தப்பட்டு வந்த பல்வேறு கல்வி உதவித்தொகைத் திட்டங்களை மீண்டும் நடைமுறைப்படுத்த வேண்டும் என்றும் கோரிக்கை விடுக்கப்பட்டது.

வக்ஃபு நிறுவனங்கள் மற்றும் அவற்றின் சொத்துகளின் விவரங்களை உமீத் இணையதளத்தில் பதிவு செய்வது தொடா்பாகவும் இச்சந்திப்பில் எடுத்துரைக்கப்பட்டது. தமிழ்நாட்டில் 6,000-க்கும் மேற்பட்ட வக்ஃபு நிறுவனங்கள் உள்ள நிலையில், அவற்றில் 4,680 வக்ஃபு நிறுவனங்களின் விவரங்கள் பதிவு செய்யப்பட்டுள்ளன. மீதமுள்ள 1,438 வக்ஃபு நிறுவனங்களின் விவரங்களை உமீத் இணையதளத்தில் பதிவேற்றுவதற்கு கூடுதலாக 90 நாட்கள் கால அவகாசம் வழங்க வேண்டும் என்று கோரிக்கை விடுக்கப்பட்டது.

மேலும், 2026 ஆம் ஆண்டு புனித ஹஜ் பயணம் மேற்கொள்வதற்காக தமிழ்நாட்டிலிருந்து 13,000-க்கும் மேற்பட்டோா் விண்ணப்பித்துள்ள நிலையில், தமிழ்நாட்டிற்கு வழங்கப்பட்டுள்ள ஹஜ் ஒதுக்கீட்டை அதிகரிக்க வேண்டும் என்று கோரிக்கை விடுக்கப்பட்டது.

பிற மாநிலங்களில் முழுமையாகப் பயன்படுத்தப்படாமல் உள்ள ஹஜ் ஒதுக்கீடுகளை தமிழ்நாட்டிற்கு மறுஒதுக்கீடு செய்து, காத்திருப்போா் பட்டியலில் உள்ள தமிழ்நாட்டைச் சோ்ந்த விண்ணப்பதாரா்களுக்கு ஹஜ் பயணம் மேற்கொள்ள வாய்ப்பு ஏற்படுத்தித் தர வேண்டும் என்றும் கேட்டுக்கொள்ளப்பட்டது.

தமிழ்நாடு அரசின் சாா்பில் முன்வைக்கப்பட்ட கோரிக்கைகளை ஒன்றிய சிறுபான்மையினா் நலத்துறை அமைச்சா் மாண்புமிகு திரு. கிரண் ரிஜிஜு அவா்கள் கேட்டறிந்து, அவற்றின் மீது உரிய பரிசீலனை மேற்கொண்டு தேவையான நடவடிக்கைகள் எடுக்கப்படும் என்று தெரிவித்ததாக ஷாஜஹான் கூறினாா்.

இச்சந்திப்பின்போது, தமிழ்நாடு அரசின் சிறுபான்மையினா் நலத்துறைச் செயலாளா் வி. தட்சிணாமூா்த்தி,, சிறுபான்மையினா் நலத்துறை ஆணையா் ஆசியா மரியம், இராமநாதபுரம் நாடாளுமன்ற உறுப்பினரும் தமிழ்நாடு வக்ஃபு வாரியத் தலைவருமான கே. நவாஸ் கனி ஆகியோா் உடனிருந்தனா்.