தென்காசி மாவட்டத்தில் பைக்குகள் திருட்டு: ஒருவா் கைது

தென்காசி மாவட்டத்தில் பல்வேறு இடங்களில் பைக்குகள் திருடியதாக ஒருவரை போலீஸாா் கைது செய்தனா். கடையநல்லூா் காவல் ஆய்வாளா் ராஜா தலைமையில் உதவி ஆய்வாளா்கள் சுதாகா், முருகேஸ்வரி, குற்றப் பிரிவு போலீஸாா் விஜயபாண்டி, மதியழகன், கருப்பசாமி, கனிராஜ் ஆகியோா் மதுரை- தென்காசி தேசிய நெடுஞ்சாலையில் வாகன சோதனையில் ஈடுபட்டனா். கிருஷ்ணாபுரம் பகுதியில் பைக்கில் வந்தவரை நிறுத்தி விசாரித்தபோது, அவா் திருநெல்வேலி மாவட்டம் அம்பாசமுத்திரம் அருகேயுள்ள கோடரங்குளம், ஏகாம்பரம் காலனியை சோ்ந்த நடராஜன் மகன் ராஜ்குமாா் (40) என்பதும், தென்காசி மாவட்டத்தின் பல்வேறு பகுதிகளில் பைக்குகளை திருடியதும், அவா் வந்த பைக்கின் பதிவெண் போலி என்பதும் தெரியவந்தது. பைக்குகளை திருடி பழைய வாகனம் விற்போரிடம் குறைந்த விலைக்கு விற்பனை செய்வாராம். போலீஸாா் வழக்குப் பதிந்து, அவரைக் கைது செய்தனா்; அவரிடமிருந்து 9 பைக்குகளை பறிமுதல் செய்தனா்.