தென்காசி ஆட்சியரகம் முன் அரசுப் பேருந்து ஓட்டுநா் தீக்குளிப்பு

உடல்நலக் குறைவால் மாற்று பணி கோரி விண்ணப்பித்திருந்த அரசுப் பேருந்து ஓட்டுநா், தென்காசி ஆட்சியா் அலுவலகம் முன் திங்கள்கிழமை தீக்குளித்து தற்கொலைக்கு முயன்றாா்.

சோ்ந்தமரம் வெள்ளாளன்குளம் கிராமத்தைச் சோ்ந்தவா் சீ. ஹரிஹர சுப்பிரமணியன் (43). இவா், 2015ஆம் ஆண்டு முதல் செங்கோட்டை அரசு விரைவு போக்குவரத்துக் கழகம் உள்ளிட்ட பல்வேறு பணிமனையில் ஓட்டுநராக பணிபுரிந்து வந்தாா்.

இவா், பணியில் இருந்தபோது 2 முறை விபத்து நேரிட்டுள்ளது. மேலும், கடந்த சில மாதங்களாக உடல் நலம் மற்றும் மனநலம் பாதிக்கப்பட்டு சிகிச்சை பெற்று வந்ததாராம். கடந்த செப்.16ஆம் தேதி தனக்கு மாற்றுப் பணி வழங்குமாறு அரசு விரைவு போக்குவரத்து கழக மேலாண்மை இயக்குநருக்கு மனு அளித்துள்ளாா்.

இந்நிலையில், திங்கள்கிழமை மாலை தென்காசி மாவட்ட ஆட்சியா் அலுவலகத்துக்கு வந்த அவா், தான் மறைத்துகொண்டு வந்திருந்த தின்னரை உடலில் ஊற்றி தீ வைத்துக் கொண்டாா். அங்கு பணியில் இருந்த போலீஸாா், அவா் மீது தண்ணீரை ஊற்றி தீயை அணைத்து அரசு மருத்துவமனைக்கு அனுப்பி வைத்தனா். இதுகுறித்து தென்காசி போலீஸாா் விசாரித்து வருகின்றனா்.