ஹெச்டிஎஃப்சி மியூச்சுவல் பண்ட் பொதுப் பங்கு வெளியீட்டுக்கு அனுமதி

ஹெச்டிஎஃப்சி அஸட் மேனேஜ்மெண்ட் நிறுவனத்தின் பொதுப் பங்கு வெளியீட்டுக்கு செபி அனுமதியளித்துள்ளது. 
இதுகுறித்து அந்த நிறுவனம் தெரிவித்துள்ளதாவது: பங்கு வெளியீட்டுக்கு அனுமதி அளிக்க கோரி இந்திய பங்குச் சந்தை ஒழுங்காற்று ஆணையத்திடம் (செபி) விண்ணப்பிக்கப்பட்டது. அனைத்து சாதகமான அம்சங்களையும் ஆராய்ந்து அறிந்து தற்போது செபி, பங்கு வெளியீட்டுக்கு அனுமதி வழங்கியுள்ளது.
இந்த பொதுப் பங்கு வெளியீட்டில் கோரிக்கை அடிப்படையிலான விற்பனைக்கு மொத்தம் 2.54 கோடி பங்குகள் வரவுள்ளன. இதில், 85.92 லட்சம் பங்குகள் ஹெச்டிஎஃப்சிக்கும், 1.68 கோடி வரையிலான பங்குகள் ஸ்டாண்டர்ட் லைஃப்-க்கும் சொந்தமானவை. ஹெச்டிஎஃப்சி ஏஎம்சி பணியாளர்களுக்காக 3.20 லட்சம் வரையிலான பங்குகள் ஒதுக்கீடு செய்யப்பட்டுள்ளன. இதைத் தவிர, ஹெச்டிஎஃப்சி பங்குதாரர்களுக்கும் 24 லட்சம் பங்குகள் ஒதுக்கப்பட்டுள்ளன.
ஹவுசிங் டெவலப்மெண்ட் பைனான்ஸ் கார்ப்பரேஷன் (ஹெச்டிஎஃப்சி) மற்றும் ஸ்டாண்டர்ட் லைஃப் இன்வெஸ்ட்மெண்ட் ஆகியவற்றின் கூட்டு நிறுவனம் ஹெச்டிஎஃப்சி ஏம்சி ஆகும். இது, கடந்த மார்ச் மாத இறுதி நிலவரப்படி ரூ.3 லட்சம் கோடிக்கும் மேலான சொத்துகளை நிர்வகித்து வருவது குறிப்பிடத்தக்கது.