‘காளை’யின் பாய்ச்சல் தொடருமா?

பங்குச் சந்தை தொடா்ந்து மூன்றாவது வாரமாக கடந்த வாரமும் மேல்நோக்கிய பயணத்தைத் தொடா்ந்தது.

Updated On :6 ஜூலை 2020, 3:11 am

பங்குச் சந்தை தொடா்ந்து மூன்றாவது வாரமாக கடந்த வாரமும் மேல்நோக்கிய பயணத்தைத் தொடா்ந்தது. ஜூன் மாதத்தில் அதிக ஜிஎஸ்டி வசூல், வாகன விற்பனை எண்ணிக்கையில் முன்னேற்றம், உள்நாட்டு முலீட்டு நிறுவனங்கள் பங்குகளை அதிகளவில் வாங்கியது, மேம்பட்ட தொழில்துறை உற்பத்தி தரவுகள் உள்ளிட்ட உள்நாட்டு புள்ளிவிவரங்கள் சந்தைக்கு உற்சாகத்தை அளித்தது. இருப்பினும், இந்தியாவில் கரோனா பாதிப்பு எண்ணிக்கை தொடா்ந்து ஏறுமுகத்தில் இருப்பது, முதலீட்டாளா்களின் கவலைகளையும் அதிகரித்துள்ளது. ஆனால், இவற்றை எல்லாம் புறந்தள்ளிவிட்டு சந்தை தொடா்ந்து ஏற்றம் பெற்று முதலீட்டாளா்களை ஆச்சரியத்துக்குள்ளாக்கியுள்ளது.

மும்பை பங்குச் சந்தைக் குறியீட்டு எண்ணான சென்செக்ஸ் கடந்த வாரம் 850.15 புள்ளிகள் (2.4 சதவீதம்) உயா்ந்து 36,021.42-இல் நிலைபெற்றுள்ளது. தேசிய பங்குச் சந்தைக் குறியீட்டு எண்ணான நிஃப்டி 224.40 புள்ளிகள் (2.16 சதவீதம்) உயா்ந்து 10,607.40-இல் நிலைபெற்றது. கடந்த மாா்ச் 23-இல் பதிவான குறைந்த நிலையிலிருந்து சென்செக்ஸ், நிஃப்டி 39 சதவீதமும், மிட்கேப், ஸ்மால் கேப் குறியீடுகள் 42 சதவீதமும் உயா்ந்துள்ளன.

லாா்ஜ் கேப் குறியீடு 3 சதவீதம் உயா்வு: கடந்த வாரத்தில் பிஎஸ்இ லாா்ஜ் கேப் குறியீடு 3 சதவீதம் உயா்ந்தது. இதில் ஹீரோ மோட்டோகாா்ப், எஸ்பிஐ லைஃப், எச்டிஎப்சி மற்றும் ஐடிசி ஆகியவை ஏற்றம் பெற்ற பட்டியலில் வந்தன. அதே நேரத்தில் பவா் ஃபைனான்ஸ் காா்ப்பரேஷன் (பிஎஃப்சி), ஹெச்பிசிஎல், அசோக் லேலண்ட் மற்றும் கோல் இந்தியா ஆகியவை நஷ்டத்தைச் சந்தித்தன.

சிறிய நிறுவனப் பங்குகளில் லாபப் பதிவு: இந்நிலையில், லாபப் பதிவு செய்யும் நோக்கில் முதலீட்டாளா்கள் நடுத்தர மற்றும் சிறிய நிறுவனப் பங்குகளை அதிக அளவில் விற்றனா். இதனால், பிஎஸ்இ மிட்-கேப் குறியீடு 0.2 சதவீதம்தான் ஏற்றம் பெற்றது. அதே சமயம், பிஎஸ்இ ஸ்மால்-கேப் குறியீடு 0.21 சதவீதம் குறைந்தது. இதில் பாரத் டைனமிக்ஸ், ஆக்ஸிஸ்கேட்ஸ் என்ஜினியரிங், சிஜி பவா், சுஸ்லான் எனா்ஜி, மயூா் யூனிகோட்டா்ஸ் மற்றும் ரிலையன்ஸ் கம்யூனிகேஷன்ஸ் ஆகியவை ஆதாயம் பெற்றன.

ஏற்றம் தொடர வாய்ப்பு: தேசிய பங்குச் சந்தையில் நிஃப்டி பி.எஸ்.யு. பேங்க் குறியீடு 6 சதவீதம் ஆதாயம் பெற்றது. எஃப்எம்சிஜி, ஐ.டி. குறியீடுகள் தலா 3 சதவீதத்திற்கும் மேலாக உயா்ந்துள்ளன. ஆட்டோ குறியீடு 3.5 சதவீதம் உயா்ந்தது. ஆனால், ரியால்டி குறியீடு கிட்டத்தட்ட 4 சதவிகிதம் குறைந்தது. கடந்த வாரத்தில், அந்நிய நிறுவன முதலீட்டாளா்கள் (எஃப்ஐஐ) ரூ .5,333.02 கோடி அளவுக்கு பங்குகளை விற்றனா். மறுபுறம் உள்நாட்டு நிறுவன முதலீட்டாளா்கள் (டிஐஐ) ரூ .5,041.25 கோடி அளவுக்கு பங்குகளை வாங்கினா். இந்நிலையில் காளையின் தற்போதைய ஏற்றம் தொடா்வதற்கே அதிக வாய்ப்பு உள்ளது என்று வல்லுநா்கள் தெரிவித்துள்ளனா்.அதிகரித்து வரும் கரோனா பரவல் பற்றிய கவலைகள் மற்றும் அமெரிக்க-சீனா இடையேயான வா்த்தகப் பதற்றம், இரண்டாவது சுற்று பொதுமுடக்கத்துக்கான வாய்ப்புகள் ஆகிய பாதகமான செய்திகள் இருந்தாலும் சந்தையில் ஏற்றத்தை எதிா்பாா்க்கலாம் என்கின்றனா் வல்லுா்கள்.

லாபப் பதிவு முக்கியம்: பெரும் பொருளாதார புள்ளி விவரத் தரவுகள் நோ்மறையாக இருந்ததால் உலகாளவிய அளவில் கடந்த வாரம் பங்குச் சந்தைகள் ஏற்றம் பெற்றன.

கடந்த மாா்ச்சில் நிஃப்டி 7,511 வரை குறைந்து 52 வார புதிய குறைந்தபட்ச அளவைப் பதிவு செய்தது. அதற்கு பின்னா் தொடா்ந்து இரண்டு நாள்களுக்குப் பிறகு சந்தை சரிவைச் சந்தித்ததில்லை. இது சந்தை வலுப்பெற்றுள்ளதைக் குறிக்கிறது. இருப்பினும், அவ்வப்போது லாபத்தை பதிவு செய்வதில் முதலீட்டாளா்கள் கவனத்துடன் இருக்க வேண்டும். ஒவ்வொரு சரிவின் போதும் பங்குகளை வாங்குவதற்கான தருணமாகப் பாா்க்க வேண்டும் என்று நிபுணா்கள் தெரிவித்துள்ளனா்.

டிசிஎஸ் காலாண்டு முடிவு: இதற்கிடையே, நிறுவனங்களின் 2020 நிதியாண்டின் முதல் காலாண்டு முடிவுகள் இந்த வாரத்திலிருந்து வெளியாக உள்ளது. வரும் ஜூலை 9-ஆம் தேதி முன்னணி ஐடி நிறுவனமான டிசிஎஸ் காலாண்டு நிதிநிலை முடிவை அறிவிக்கவுள்ளது.இதன் முடிவை சந்தை ஆா்வத்துடன் எதிா்பாா்த்துள்ளது மேலும், பருவமழையின் முன்னேற்றம் சந்தைக்கு சாதகமாக அமையும். சமீபகாலமாக நம்பிக்கையின் அடிப்படையிலேயே சந்தை ஏற்றம் கண்டுள்ளது. களத்தின் உண்மை நிலவரம் சந்தையில் எதிரொலிக்கவில்லை என்பதை நினைவில் கொள்ளவேண்டும் என்றும் நிபுணா்கள் தெரிவித்துள்ளனா்.

புள்ளிவிவரத் தரவுகள்: தொழில்துறை உற்பத்தி தரவுகள், அந்நியச் செலாவணி கையிருப்பு குறித்த புள்ளி விவரத் தரவுகள் ஜூலை 10-ஆம் தேதி வெளியாகவுள்ளன. இவை சந்தையில் லேசான தாக்கத்தை ஏற்படுத்தும். மொத்தத்தில் பாதகமான செய்திகள் ஏதும் இல்லாத பட்சத்தில் சந்தையில் காளையின் பாய்ச்சல் தொடா்வதற்கே அதிக வாய்ப்பு உள்ளது என்கின்றனா் நிபுணா்கள்.

தொழில்நுட்பப் பாா்வை

சமீப காலமாக சரிவின் போது ஒவ்வொரு முறையும் நிஃ்டி 10,200 புள்ளிகளில் நல்ல ஆதரவை பெற்றுள்ளது. எனவே, நிஃப்டிக்கு 10,200 என்பது நல்ல ஆதரவாகவே தொடரும். மேலும், நிஃப்டி ஸ்திர நிலை பெற்று முக்கிய இடா்பாட்டு நிலையான 10,553 புள்ளிகளைக் கடந்து நிலை பெற்றுள்ளது. இதுவும் சந்தை தொடா்ந்து வலுப்பெறுவதற்கான அறிகுறியாகவே பாா்க்கப்படுகிறது. மேலும், கடந்த மாா்ச் 9-ஆம் தேதிக்குப் பிறகு 64 வா்த்தக தினங்களில் இப்போதுதான் 10,600 புள்ளிகளைக் கடந்துள்ளது. எனவே, நிஃப்டி ஏறுமுகம் பெற்று 10,800-க்கு செல்வதற்குஅதிக வாய்ப்பு உள்ளது. 10,700-10,800 என்பது கடுமையான இடா்பாட்டு நிலையாகும். அதே சமயம், 10,450-10330 என்பது நல்ல ஆதரவு நிலையாக உள்ளது. நிஃப்டி 10,500 நிலைக்கு மேலே வா்த்தகமாகு வரை சந்தையில் நோ்மறை உணா்வு இருக்கும். குறுகிய கால அடிப்படையில் பாா்த்தால், நிஃப்டி 10,800-ஐ கடந்து நிலைபெறும் பட்சத்தில் 11,000-ஐ நோக்கி முன்னேறும் என்று தொழில்நுட்ப நிபுணா்கள் கருதுகின்றனா்.

கடந்த ஜூன் 3-ஆம் தேதி நிலவரப்படி ஒரு மாத காலத்தில் தேசிய பங்குச் சந்தையில் துறைவாரியான குறியீடுகளின் செயல்பாடு விவரம் (சதவீதத்தில்)

பிஎஸ்யு பேங்க் 12.83

பிரைவேட் பேங்க் 7.72

ஃபைனான்சியல் சா்வீஸஸ் 7.52

பேங்க் 7.11

ஆட்டோ 7.06

நிஃப்டி-50 5.77

ஐடி 4.50

மீடியா 3.87

எஃப்எம்சிஜி 3.06

ரியால்ட்டி 2.91

மெட்டல் 1.80