ரெப்கோ ஹோம் ஃபைனான்ஸ் நிகர லாபம் 18 சதவீதம் உயா்வு

சென்னை, ஆக. 2: ரெப்கோ ஹோம் ஃபைனான்ஸ் நிறுவனத்தின் நிகர லாபம் நடப்பு நிதியாண்டின் முதல் காலாண்டில் 18 சதவீதம் உயா்ந்துள்ளது.

இது குறித்து நிறுவனம் வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

கடந்த ஜூன் 30-ஆம் தேதியுடன் நிறைவடைந்த நடப்பு 2024-25-ஆம் நிதியாண்டின் முதல் காலாண்டில் நிறுவனத்தின் நிகர லாபம் ரூ.105 கோடியாக உள்ளது. இது, முந்தைய 2023-24-ஆம் நிதியாண்டின் அதே காலாண்டோடு ஒப்பிடுகையில் 18 சதவீதம் அதிகம். அப்போது நிறுவனம் ரூ.89 கோடி நிகர லாபம் ஈட்டியிருந்தது.

கடந்த நிதியாண்டின் முதல் காலாண்டில் ரூ.162 கோடியாக இருந்த நிறுவனத்தின் நிகர வட்டி வருவாய் நடப்பு நிதியாண்டின் அதே காலாண்டில் 8 சதவீதம் அதிகரித்து ரூ.175 கோடியாக உள்ளது.

மதிப்பீட்டுக் காலாண்டில் நிறுவனத்தின் கடனளிப்பு ரூ.684 கோடியிலிருந்து ரூ.680 கோடியாகக் குறைந்துள்ளது என்று அந்தச் செய்திக்குறிப்பில் தெரிவிக்கப்பட்டுள்ளது.