பஜாஜ் நிகர லாபம் 18% உயா்வு

பஜாஜ் ஆட்டோ நிறுவனத்தின் ஒருங்கிணைந்த நிகர லாபம் கடந்த ஜூன் காலாண்டில் 18 சதவீதம் உயா்ந்துள்ளது.

Updated On :16 ஜூலை 2024, 6:58 pm

புது தில்லி: பஜாஜ் ஆட்டோ நிறுவனத்தின் ஒருங்கிணைந்த நிகர லாபம் கடந்த ஜூன் காலாண்டில் 18 சதவீதம் உயா்ந்துள்ளது.

இது குறித்து நிறுவனம் செவ்வாய்க்கிழமை வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

கடந்த ஜூன் 30-இல் நிறைவடைந்த நடப்பு நிதியாண்டின் முதல் காலாண்டில் நிறுவனத்தின் ஒருங்கிணைந்த லாபம் ரூ.1,942 கோடியாக உள்ளது. இது, முந்தைய 2023-24-ஆம் நிதியாண்டின் இதே காலாண்டோடு ஒப்பிடுகையில் 18 சதவீதம் அதிகம். அப்போது நிறுவனத்தின் ஒருங்கிணைந்த நிகர லாபம் ரூ.1,644 கோடியாக இருந்தது.

மதிப்பீட்டுக் காலாண்டில் நிறுவனத்தின் செயல்பாட்டு மொத்த வருவாய் ரூ.10,312 கோடியிலிருந்து ரூ.11,932 கோடியாக உயா்ந்துள்ளது என்று பஜாஜ் ஆட்டோ ஒரு ஒழுங்குமுறைத் தாக்கல் ஒன்றில் தெரிவித்துள்ளது.

நிறுவனத்தின் தனிப்பட்ட நடவடிக்கைகளின் அடிப்படையில் பெறப்பட்ட ஒருங்கிணைந்த நிகர லாபம் கடந்த ஜூன் காலாண்டில் ரூ.1,988 கோடியாக உள்ளது. இது கடந்த நிதியாண்டுடன் (ரூ.1,665 கோடி) ஒப்பிடுகையில் 19 சதவீதம் அதிகம் என்று அந்தச் செய்திக்குறிப்பில் தெரிவிக்கப்பட்டுள்ளது.

டிரெண்டிங்