பகுதி - 385

புடை செப்பு என முத்து அணி கச்சு அற உள் பொருமிக் கலசத்து இணையாய புளகக் களபக் கெருவத் தன மெய்ப் புணரத் தலை இட்டு அமரே செய்... பருத்ததும்; சிமிழ்போன்றதும்; முத்து மாலை அணிந்ததும்; கச்சு தெறித்துப் போகும்படியாக விம்மிதம் எய்தியதும்; கலசத்தை ஒத்ததும்; மயிர்க்கூச்சம் கொண்டதும்; சந்தனக் கலவை பூசப்பட்டதுமாக செருக்குற்றுத் திமிர்ந்த மார்பகங்களோடு சேரத் தலைப்பட்டு பூசலிடுகின்ற,

அடைவில் தினம் உற்று அவசப்படும் எற்கு அறிவில் பதடிக்கு அவமான அசடற்கு உயர் ஒப்பது இல் நல் க்ருபை உற்று அடிமைக்கு ஒரு சொல் புகல்வாயே... ஒழுக்கத்தை எப்போதும் மேற்கொண்டு வசமிழந்து மயங்கும் என் மீது; அறிவற்றவனும்; பயனற்றவனுமான எனக்கு ஒப்பும் உயர்வும் இல்லாத உன்னுடைய கிருபையைக் கொண்டு, அடிமையாகிய எனக்கு ஒப்பற்ற உபதேசத்தைச் செப்பியருள வேண்டும்.

குடம் ஒத்த கடக் கரடக் கலுழிக் குணம் மெய்க் களிறுக்கு இளையோனே... குடத்தை ஒத்த கன்னக் கதுப்பிலிருந்து மதநீர் பெருகுகின்ற தன்மையையுடைய யானைமுகனான விநாயகனுக்கு இளையவனே!

குடி புக்கிட மி(மீ)ட்டு அசுரப் படையைக் குறுகித் தகரப் பொரும் வேலா... (தேவலோகத்துக்குக்) குடியேறுமாறு (தேவர்களைச் சூரனுடைய சிறையிலிருந்து) மீட்டு, அசுரப்படைகளை நெருங்கி, அவை தகர்ந்துபோகுமாறு போரிட்ட வேலனே!

படலைச் செறி நல் கதலிக் குலையில் பழம் முற்(றி) ஒழுகப் புனல் சேர் நீள் பழனக் கரையில் கழை முத்து உகு நல் பழநிக் குமரப் பெருமாளே.... சீப்புகள் அடர்த்தியாக நிறைந்துள்ள வாழைக் குலை நன்கு கனிந்து அதிலிருந்து தேன் ஒழுக; நீர் நிறைந்த வயற்கரைகளில் மூங்கில்கள் முத்தை உகுக்கின்ற பழநிப் பதியில் வீற்றிருக்கும் பெருமாளே!

சுருக்க உரை

குடம்போன்ற மத்தகத்திலிருந்தும் கன்னக் கதுப்பிலிருந்தும் மதநீர் பெருகும் இயல்புள்ள களிறான விநாயகனுக்கு இளையவனே!  தேவர்கள் தம்முடைய லோகத்திலே மீண்டும் குடியேறுமாறு அவர்களை அசுரர்களின் சிறையினின்று மீட்டு; அசுரப் படைகள் தகர்ந்துபோகுமாறு போரிட்ட வேலனே!  சீப்புகள் அடர்த்தியாக நெருங்கியுள்ள வாழைக் குலைகள் கனிந்து அவற்றிலிருந்து தேன் ஒழுகுவதும்; நீர் நிறைந்த வயற்கரைகளில் மூங்கில்கள் முத்தை உகுப்பதுமான பழநிப் பதியில் வீற்றிருக்கும் பெருமாளே!

பருத்ததும்; சிமிழ்போன்றதும்; முத்துமாலை அணிந்ததும்; கச்சு தெறித்துப் போகும்படியாக விம்முவதும்; கலசத்தை ஒத்ததும்; மயிர்க்கூச்சம் கொண்டதும்; சந்தனக் கலவை பூசப்பெற்று செருக்குற்றுத் திமிர்ந்ததுமான மார்பகங்களோடு சேர்வதை எண்ணிப் பூசலிடும் ஒழுக்கத்தையே என்றென்றும் மேற்கொண்டு தன் வசத்தை இழந்து மயங்குபவனும்; அறிவற்றவனும் பயனற்றவனுமான எனக்கு ஒப்பும் உயர்வும் இல்லாத உன்னுடை கிருபையை வெளிப்படுத்தி, அடிமையாகிய எனக்கு ஒப்பற்றதான உபதேசத்தைப் புரிந்தருள வேண்டும்.