வண்டின் முதுகில் கேமரா!

டிஜிட்டல் கேமராவும், மொபைல் கேமராவும் வந்த பிறகு கேராக்களை பறக்கவிட்டு, ஓடவிட்டு, தண்ணீரில் மூழ்கவிட்டு - பருந்துப் பார்வை, கழுகுப் பார்வை, மீன் பார்வை எனப் பல பார்வைக் கோணங்களில் பல்வேறு வகையிலான விடியோ, புகைப்படங்கள் எடுக்கப்படுகின்றன.

இந்த விடியோக்களைப் பார்க்கும்போது, கேமரா எதன் மீது பொருத்தப்பட்டுள்ளதோ அந்த பிராணிகளின் பார்வையே நமது பார்வையாக மாறிவிடுகிறது. ஆனால் அந்த விடியோவில் பதிவாகும் ஒவ்வொரு காட்சியும் அந்தப் பிராணிகளைக் கொண்டு ஆய்வு நடத்தும் ஆராய்ச்சியாளர்களுக்குக் கிடைக்கும் அரிய தகவல்களாக உள்ளன.

தற்போது வண்டின் முதுகில் ரோபோ கேமரா ஒன்றைப் பொருத்தி முதல் முறையாக அதன் தலை அசைவுகள் படம் பிடிக்கப்பட்டுள்ளன.
வண்டிற்குச் சுமையாக இல்லாத வகையில் வெறும் கால் மில்லி கிராம் எடை கொண்டது இந்த ரோபோகேமரா. வண்டு சிறகடித்து பறப்பதற்கேற்ப சில மணி நேரம் ஒருபுறமாகவும், சாய்ந்தும் வண்டுக்கு பாரம் இல்லாம் செயல்படுகிறது.

நொடிக்கு 5 பிரேம்களும், 60 டிகிரி சுழன்றும் படம்பிடிக்கும் மிகச் சிறிய கேமராவும், ஸ்மார்ட் போனுக்கு விடியோவை அனுப்பும் டிரான்ஸ்மிட்டரும் எனப் பல்வேறு சாதனங்கள் இந்த ரோபோ கேமராவில் உள்ளது.

இந்தக் கேமராவை ஸ்மார்ட் போன் மூலமே இயக்கலாம். பூச்சிகள் தங்களின் 10 முதல் 20 சதவீத உடல் சக்தியை மூளை செயல்பாட்டுக்குப் பயன்படுத்துகின்றன. மீதமுள்ள சக்தியை தேவைக்கு ஏற்ப கண்களின் மூலம் பயன்படுத்துகின்றன. அதுவும் தூரத்தின் தேவைக்கு ஏற்ப இந்த சக்தியின் பயன்பாடு அமைகிறது.

இதை அடிப்படையாக வைத்து தேவைக்கு ஏற்ப பயன்படுத்தும் வகையில் சிறிய அளவு பாட்டரி இந்த ரோபோ கேமராவில் இணைக்கப்பட்டுள்ளது.

விடியோவை ஒளிபரப்பும் உலகின் மிகச் சிறிய ரோபோ கேமராவும் இதுதான். கற்கள், மண் போன்றவற்றின் மீது ஏறி அசைந்து கொண்டே செல்லும் வண்டின் மேல் இருந்து அசையாமல் படம் பிடிக்கும் இந்த ரோபோ கேமராவை உருவாக்கிய வாஷிங்டன் பல்கலைக்கழக விஞ்ஞானிகளின் செயல் வியக்க வைக்கிறது.