முகநூலில் இருந்து கூகுளுக்கு!

முகநூலில் தங்கள் போட்டோக்களைப் போட்டு பிறர் அதை "லைக்', "ஷேர்' "டேக்' பண்ண வேண்டும் என்பதற்காக இளைஞர்கள் நேரத்தையும், பணத்தையும் செலவிட்டு வருகின்றன. இதனால் நவீன கேமரா உள்ள விலை உயர்ந்த ஸ்மார்ட் போன்கள், சந்தையில் அதிக அளவில் விற்பனையாகி வருகின்றன.

ஏராளமான போட்டோக்கள் ஸ்மார்ட் போன்களில் தேங்கிவிடுவதால், இடப்பற்றாக்குறை ஏற்படுகிறது. இந்தப் பிரச்னையைத் தீர்க்க ஸ்மார்ட் போன்களில் எடுத்த போட்டோக்களை நேரடியாக கூகுள் போட்டோக்களில் பதிவேற்றி வைத்து கொள்ளலாம்.

2004 -ஆம் ஆண்டு ஃபேஸ்புக் தொடக்கத்தில் இருந்து அதில் பதிவேற்றம் செய்யப்பட்டுள்ள போட்டோக்கள், வீடியோக்கள் ஆகியவற்றைப் பதிவிறக்கம் செய்து பாதுகாக்க வேண்டியதாகி இருந்தது.

இந்நிலையில், ஃபேஸ்புக்கில் உள்ள போட்டோக்களை அப்படியே கூகுள் போட்டோக்களில் பதிவேற்றம் செய்து பாதுகாக்கும் புதிய சேவை தற்போது அறிமுகம் செய்யப்பட்டுள்ளது.

நீங்கள் ஃபேஸ்புக் செட்டிங்சில் சென்று "யுவர் ஃபேஸ்புக் இன்ஃபர்மேஷனை' கிளிக் செய்து "டிரான்ஸ்பர் ஏ காப்பி ஆப் யுவர் ஃபோட்டோஸ் ஆர் வீடியோ'வை கிளிக் செய்து ஃபேஸ்புக்கின் பாஸ்வேர்டை மீண்டும் டைப் செய்தால்போதும்.

உங்கள் போட்டோக்களை கூகுள் போட்டோக்களில் பதிவேற்றம் செய்துவிடலாம். போட்டோ அல்லது வீடியோ என தனித்தனியாக பதிவேற்றம் செய்ய வேண்டும். கணினி அல்லது ஸ்மார்ட் போன்களிலும் இந்த சேவையைப் பயன்படுத்தலாம்.

முன்பு குறிப்பிட்ட சில நாடுகளுக்கு மட்டும் வழங்கப்பட்டிருந்த இந்த சேவையை ஃபேஸ்புக் நிறுவனம் தற்போது அனைவருக்கும் அறிமுகம் செய்துள்ளது. பழைய புகைப்படங்களை கூகுள் போட்டோஸில் பதிவேற்றம் செய்துவிட்டு ஃபேஸ்புக்கில் அழித்துவிடுவதுதான் பாதுகாப்பானது.