மழை தரும் குடைகள்!

தழைகள் அடர்ந்திருக்கும் குடைகள் - மலை
தரையில் அசைந்திருக்கும் குடைகள்!

நிழலை உவந்தளிக்கும் குடைகள் - தலை 
நிமிர்ந்து உயர்ந்திருக்கும் குடைகள்!

கிளைகள் அமைந்திருக்கும் குடைகள் - பசுங்
கிளிகள் அமர்ந்திருக்கும் குடைகள்!

குளுமை நிறைந்திருக்கும் குடைகள்! - இசைக் 
குயில்கள் இணைந்திருக்கும் குடைகள்!

மலர்கள் மலர்ந்திருக்கும் குடைகள் - பிணி 
மறையும் மருந்தளிக்கும் குடைகள்! 

பழங்கள் கனிந்திருக்கும் குடைகள் - உயிர் 
பலவின் பசி தணிக்கும் குடைகள்!

குழந்தை நடக்க வண்டியுடனே - ஆடும் 
குதிரைக் கொடையளிக்கும் குடைகள்! 

தளர்ந்த முதியோர் கைத் தடிகள் - உடன் 
இருக்கை, படுக்கை தரும் குடைகள்!

அலையில் படகளிக்கும் குடைகள் - கரை 
அடையத் துடுப்பளிக்கும்  குடைகள்! 

கலமாய்க் கடல் மிதக்கும் குடைகள் - பல 
கண்டம் தனைக் கடக்கும் குடைகள்!

இலைகள் பழுத்துதிர்க்கும் குடைகள் - அதை 
எரிப்பின் குளிர் துரத்தும் குடைகள்! 

உலைக்கு விறகளிக்கும் குடைகள் - சுவை 
உணவைச் சமைத்தளிக்கும் குடைகள்!

கழனி உழவுழைக்கும் குடைகள் - ஏர்க் 
கலப்பை உருவளிக்கும் குடைகள்! 

மழையை வரவழைக்கும் குடைகள் - பசும் 
"மரங்கள்' எனும் இயற்கைக் குடைகள்!