அமெரிக்க தேர்தல்: தமிழர் ராஜா கிருஷ்ணமூர்த்தி உட்பட 2 இந்தியர்கள் தேர்வு

நியூ யார்க்: உலகமே அமெரிக்க அதிபர் தேர்தலை உற்று நோக்கிக் கொண்டிருக்கும் நிலையில், இல்லினோயிஸ் மாகாணத்தின் செனட் உறுப்பினர் தேர்தலில் ராஜா கிருஷ்ணமூர்த்தி என்ற தமிழர் வெற்றி பெற்றுள்ளார்.

ஜனநாயகக் கட்சி சார்பில் போட்டியிட்ட ராஜா கிருஷ்ணமூர்த்தி, குடியரசுக் கட்சி வேட்பாளர் பீட்டர் டிசியன்னியை தோற்கடித்துள்ளார்.

43 வயதாகும் கிருஷ்ணமூர்த்தி, வளர்ந்து வரும் அரசியல்வாதிகளின் பிரதிநிதியாக விளங்குகிறார். இவருக்கு ஆதரவாக பராக் ஒபாமா பிரசாரத்தில் ஈடுபட்டதும் குறிப்பிடத்தக்கது.

புது தில்லியில் பிறந்த ராஜா கிருஷ்ணமூர்த்தி, பிரின்ஸ்டன் பல்கலைக் கழகத்தில் மெக்கானிக்கல் பொறியியல் படித்தவர். பிறகு ஹார்வர்ட் பல்கலைக்கழகத்தில் சட்டம் படித்து வழக்குரைஞராக பணியாற்றி, ஊழலுக்கு எதிராக பணியாற்றியவர் என்பது குறிப்பிடத்தக்கது.

இவருடன் மற்றொரு இந்தியர் கமலா ஹாரீஸ் கலிபோர்னியா மாகாணத்தில் இருந்து செனட் உறுப்பினர் பதவிக்கு தேர்வு செய்யப்பட்டுள்ளார்.