தமிழ்ச் சங்கத்தில் பொங்கல் விழா

பெங்களூர், ஜன. 8: பெங்களூர்த் தமிழ்ச் சங்கத்தில் ஜனவரி 15-ம் தேதி பொங்கல் விழா கொண்டாடப்படுகிறது, இதில் திராவிடர் கழகத் தலைவர் கி.வீரமணி கலந்து கொள்கிறார்.

 இதுகுறித்து தமிழ்ச் சங்கச் செயலாளர் கோ.தாமோதரன் வெளியிட்டுள்ள செய்திக் குறிப்பு: பெங்களூர்த் தமிழ்ச் சங்கம் சார்பில் பொங்கல் விழா, திருவள்ளுவர் நாள் மற்றும் தமிழ் புத்தாண்டு ஆகிய முப்பெரும் விழாக்கள் ஜனவரி 15 மற்றும் 16-ம் தேதிகளில் கொண்டாடப்படுகிறது.

ஜனவரி 15-ம் தேதி மாலை 5 மணிக்கு சங்க மாணவர்களின் இசை நிகழ்ச்சியை ஆசிரியர் ரபி நடத்துகிறார். அன்று மாலை 6 மணிக்கு பொங்கல் விழா சிறப்புரையை கி.வீரமணி நிகழ்த்துகிறார்.

 16ம் தேதி மாலை 5 மணிக்கு சாந்த சீலனின் தந்திரக் காட்சிகள், மாலை 6 மணிக்கு வாழ்க்கை என்பது பூந்தோட்டமா, போராட்டமா என்ற தலைப்பில் பட்டி மண்டபம் நடக்கிறது. உலக திருக்குறள் பேரவை செயலாளர் புலவர் மணி. தி.சு. மலையப்பன் நடுவராகப் பணியாற்றுகிறார் என்று அதில் கூறப்பட்டுள்ளது.