"ஹஜ் மாளிகைக்கு திப்புசுல்தான் பெயர் வைத்தால் தீவிர போராட்டம்'

ஹஜ் மாளிகைக்கு திப்புசுல்தான் பெயர் வைத்தால் தீவிர போராட்டம் நடத்தப்படும் என முன்னாள் பேரவைத் தலைவரும், குடகு மாவட்டத்தின் பாஜக எம்.எல்.ஏ.வுமான கே.ஜி.போப்பையா தெரிவித்தார்.
கர்நாடக அரசின் சிறுபான்மையினர் நலத்துறை சார்பில் பெங்களூரில் ஹஜ் மாளிகை அமைக்கப்பட்டுள்ளது. ஹஜ் மாளிகைக்கு திப்புசுல்தான் பெயரை சூட்டுமாறு இஸ்லாமிய சமுதாயத்தினர் கோரிக்கை விடுத்திருந்தனர். இதை பரிசீலித்து நடவடிக்கை எடுக்கப்போவதாக சிறுபான்மையினர் நலத்துறை அமைச்சர் ஜமீர் அகமது தெரிவித்திருந்தார்.
இந்த விவகாரத்தை கையில் எடுத்துள்ள பாஜக, திப்புசுல்தான் பெயரை ஹஜ் மாளிகைக்கு சூட்ட கடும் எதிர்ப்பு தெரிவித்துள்ளது. பாஜக மாநிலத் தலைவரும், எதிர்க்கட்சித் தலைவருமான பி.எஸ்.எடியூரப்பா, ஹஜ் மாளிகைக்கு புதிய பெயரை சூட்ட வேண்டிய அவசியமில்லை. ஹஜ் மாளிகைக்கு பெயர் சூட்டியே ஆகவேண்டுமென்றால், முன்னாள் குடியரசுத் தலைவர் அப்துல் கலாம் பெயரை வைக்கலாம் என்று ஆலோசனை வழங்கியிருந்தார். 
இதே கருத்தை, திப்புசுல்தானுக்கு கடும் எதிர்ப்பு நிலவும் குடகு மாவட்டத்தை சேர்ந்த பாஜக எம்.எல்.ஏ. கே.ஜி.போப்பையாவும் வலியுறுத்தியிருக்கிறார். அவர் மேலும் கூறியது: பாஜக மாநிலத் தலைவர் எடியூரப்பா கூறியிருப்பதுபோல, ஹஜ் மாளிகைக்கு அப்துல் கலாம் பெயரை சூட்டலாம். ஒருவேளை திப்புசுல்தான் பெயரை ஹஜ் மாளிக்கைக்கு சூட்டினால், மாநிலத்தில் மதக் கலவரங்கள் வெடிக்கும் வாய்ப்புள்ளது. மேலும், பாஜக மாநிலம் தழுவிய போராட்டம் நடத்தும் என்றார் அவர்.