ரயிலில் சாகச ரீல்ஸ்: மூன்றாண்டுகளுக்கு பின்பு சிக்கிய மாணவா்கள்

சென்னை மின்சார ரயிலின் மேற்கூரையின் மீது மாணவா்கள் பயணித்த ரீல்ஸ் (விடியோ) தற்போது வைரலான நிலையில், சம்பந்தப்பட்டவா்களை காவல் நிலையத்தில் ஆஜராகுமாறு ரயில்வே போலீஸாா் அறிவுறுத்தியுள்ளனா்.

சென்னை சென்ட்ரல், கடற்கரையிலிருந்து புகா் பகுதிகளுக்கு தினமும் மின்சார ரயில் இயக்கப்பட்டு வருகிறது. இதில் பயணம் செய்யும் கல்லூரி மாணவா்கள் சிலா் ரயில் படிக்கட்டில் தொங்கியபடியும், ஜன்னல் கம்பியில் தொங்கியபடியும் சாகசம் செய்து பயணிகளுக்கு இடையூறு ஏற்படுத்தி வந்தனா். சமீபகாலமாக ரயில்வே போலீஸாரின் தொடா் கண்காணிப்பு, விழிப்புணா்வு காரணமாக இதுபோன்ற சம்பவங்கள் குறைந்து காணப்படுகின்றன.

இந்நிலையில், கடந்த 3 ஆண்டுகளுக்கு முன்பு மின்சார ரயில் மேற்கூரையில் பயணம் செய்து, அதை விடியோ பதிவு செய்துள்ளனா். இந்த விடியோ தற்போது சமூக வலைதளங்களில் பரவி வருகிறது.

சென்னை கோட்டை - கடற்கரை ரயில் நிலையங்களுக்கு இடையே மாணவா்கள் சிலா் ரயில் சாகசம் செய்து தற்போது அதை சமூக வலைதளத்தில் பதிவிட்டுள்ளதாகக் கூறப்படுகிறது.

இந்நிலையில், எழும்பூா் ரயில்வே போலீஸாா் இரு பிரிவுகளின் கீழ் வழக்குப் பதிந்து அதுகுறித்து விசாரணை நடத்தி வருகின்றனா். அந்த விடியோவில் உள்ளவா்கள் தற்போது கல்லூரி படிப்பு முடிந்து வேலை செய்து வருவதாக தெரியவந்துள்ளது. அதில் ஒருவா் கடன் வசூல் செய்யும் முகவராகப் பணியாற்றி வருகிறாா். திருவள்ளூா் மாவட்டத்தைச் சோ்ந்த அவா் உள்ளிட்ட மூன்று பேரை எழும்பூா் ரயில்வே காவல் நிலையத்தில் ஆஜராகுமாறு போலீஸாா் அறிவுறுத்தியுள்ளனா்.