மாமல்லபுரம் ரிசாா்ட்களில் புத்தாண்டு கேளிக்கை நிகழ்ச்சிகளுக்கு தடை

புத்தாண்டு தினத்தை முன்னிட்டு, மாமல்லபுரம் கிழக்கு கடற்கரை சாலைகளில் உள்ள ரிசாா்ட்களில் கேளிக்கை நிகழ்ச்சிகள் நடத்தவும், கடற்கரையில் மக்கள் கூடவும் தடைவிதிக்கப்பட்டுள்ளதாக செங்கல்பட்டு மாவட்டக் காவல் கண்காணிப்பாளா் கண்ணன் அறிவித்தாா்.

மாமல்லபுரத்தில் புத்தாண்டு கொண்டாட்டத்தின்போது கடைப்பிடிக்க வேண்டிய வழிகாட்டி நெறிமுறைகள் குறித்த ஆலோசனைக் கூட்டம் மாவட்டக் காவல் கண்காணிப்பாளா் கண்ணன் தலைமையில் சனிக்கிழமை நடைபெற்றது.

இதில், மாமல்லபுரம் மற்றும் கிழக்குக் கடற்கரை சாலையில் உள்ள உணவகங்கள், விடுதிகள், கடற்கரை பண்ணை வீடுகள் ஆகியவற்றின் இயக்குநா்கள், உரிமையாளா்கள் பங்கேற்றனா்.

கூட்டத்தில் காவல் கண்காணிப்பாளா் பேசியது:

தற்போது கரோனா தொற்றின் மற்றொரு அலை இங்கிலாந்தில் வேறு வடிவில் புதிதாக உருவாகி பரவி வருகிறது. எனவே முன்னெச்சரிக்கை நடவடிக்கையாக, வரும் புத்தாண்டு அன்று மக்கள் கூட்டமாக திரளுவதற்கு தடை விதிக்கப்பட்டுள்ளது. இந்த ஆண்டு கிழக்குக் கடற்கரை சாலையில் முட்டுக்காடு முதல் மாமல்லபுரம் வரை உள்ள நட்சத்திர உணவகங்கள், விடுதிகள், ரிசாா்ட்கள், பண்ணை வீடுகளில் புத்தாண்டு கொண்டாட்டத்துக்கு முழுவதுமாக தடை விதிக்கப்பட்டுள்ளது. மது விருந்துடன் கேளிக்கை நிகழ்ச்சிகள், ஆடல், பாடல்களுடன் கூடிய இசை, நடன நிகழ்ச்சிகள் நடத்த தடை விதிக்கப்பட்டுள்ளது. கடலில் குளிக்கவும் தடைவிதிக்கப்பட்டுள்ளது.

புத்தாண்டு கொண்டாட்டத்துக்கு வருவோா் 31-ஆம் தேதி இரவு 10 மணிக்குள் அந்தந்த விடுதிகளுக்கு வந்து தங்கி விட வேண்டும். அறைகளில் தங்குவதற்கும், உணவகங்களுக்கு செல்லவும் எவ்விதத் தடையும் இல்லை. உணவு அருந்தி விட்டு விருந்தினா்கள் யாரும் தங்கள் அறைகளைவிட்டு வெளியே வரக்கூடாது. அதேபோல் நீச்சல் குளங்கள் செயல்படுவதற்கும் அனுமதி கிடையாது. கூட்டமாக வாண வேடிக்கை நிகழ்ச்சி நடத்தவும் தடை விதிக்கப்பட்டுள்ளது. அறைகளிலேயே அவா்கள் புத்தாண்டை கொண்டாடவேண்டும்.

புத்தாண்டு கொண்டாட்டத்தின்போது ஈசிஆா் சாலையில் மது அருந்திவிட்டு வாகனம் ஓட்டினால், வாகனம் பறிமுதல் செய்யப்பட்டு, ஓட்டுநா் உரிமம் ரத்து செய்யப்படும். போதையில் பெண்களை கிண்டல் செய்வோா் கைது செய்யப்படுவா்.

வரும் 31-ஆம் தேதி மாலை 6 மணி முதல் முட்டுக்காடு சோதனைச் சாவடியில் இரு சக்கர வாகனங்கள் தணிக்கை செய்யப்பட்டு, சென்னை மற்றும் புகா் பகுதிகளில் இருந்து வரும் இளைஞா்கள் திருப்பி அனுப்பப்படுவா். இவா்கள் மாமல்லபுரம் செல்ல அனுமதி கிடையாது. குடும்பத்துடன் இரு சக்கர வாகனத்தில் வருபவா்கள் மாமல்லபுரம் செல்ல வழக்கம்போல் அனுமதிக்கப்படுவா் என்றாா்.

மாமல்லபுரம் உதவி காவல் கண்காணிப்பாளா் சுந்தரவதனம், காவல் ஆய்வாளா் வடிவேல் முருகன், ஓட்டல் உரிமையாளா்கள் சங்க மாநில துணைத் தலைவா் கே.பாண்டியன், ரெஸ்டாரண்டுகள் சங்க நிா்வாகி பி.சண்முகானந்தன் மற்றும் மாமல்லபுரம் ஓட்டல்கள், கேளிக்கை விடுதிகள் மற்றும் பண்ணை வீடுகள் உரிமையாளா்கள், இயக்குநா்கள் உள்ளிட்டோா் கலந்து கொண்டனா்.