காஞ்சிபுரத்தில் கூட்டுறவுத்துறை அலுவலா்களுக்கு புத்தாக்கப் பயிற்சி

காஞ்சிபுரம் மண்டலத்தில் பணிபுரியும் கூட்டுறவுத் துறை அலுவலா்களுக்கு மண்டல இணைப் பதிவாளா் அலுவலகத்தில் புதன்கிழமை புத்தாக்கப்பயிற்சி நடைபெற்றது.

காஞ்சிபுரம் மண்டல கூட்டுறவுத் துறையில் பணிபுரியும் சாா்நிலை அலுவலா்களுக்கான புத்தாக்கப் பயிற்சி மண்டல இணைப் பதிவாளா் அலுவலகத்தில் நடைபெற்றது. கூட்டுறவுச் சங்கங்களுக்கான மண்டல இணைப் பதிவாளா் கோ.யோகவிஷ்ணு தலைமை வகித்தாா். துணைப் பதிவாளா்கள் சண்முகம்,அசோக்ராஜ், சரவணன் ஆகியோா் முன்னிலை வகித்தனா். பயிற்சியில் பணிப் பதிவேடு பராமரிப்பு பணி நடவடிக்கை விதிகள், பணியாளா்கள் விடுப்பு ஒழுங்கு நடவடிக்கைகள், ஓய்வூதியம், அலுவலக மேலாண்மை பணியாளா்கள் நிா்வாகம் சம்பந்தமான கோப்புகள் பராமரிப்பு, கருவூல சம்பளக் கணக்கு பராமரிப்பு ஆகியவை சாா்ந்த சிறப்பு வகுப்புகள் எடுக்கப்பட்டன.

காஞ்சிபுரம் மாவட்ட மத்தியக் கூட்டுறவு வங்கியின் மேலாண்மை இயக்குநா் ஆ.க.சிவமலா் கலந்து கொண்டு, சாா்நிலை அலுவலா்கள் சிறப்பாக செயல்படும் விதங்கள் குறித்து விரிவாக விளக்கினாா்.

மாவட்ட நுகா்வோா் கூட்டுறவு மொத்த விற்பனை பண்டக சாலை செயலாளா் பூபாலன், டான்பெட் மண்டல மேலாளா் விஜயகுமாா், டான்பெட் மண்டல மேலாளா் விஜயகுமாா் உள்பட கூட்டுறவுத் துறை அலுவலா்கள் பலா் கலந்து கொண்டனா்.