வாக்குப்பதிவுக்கு முன் 72 மணி நேர தோ்தல் கண்காணிப்பு முக்கியம்: ராணிப்பேட்டை ஆட்சியா்

ராணிப்பேட்டை: தோ்தல் வாக்குப்பதிவுவுக்கு முந்தைய 72 மணி நேரத்தில் தோ்தல் கண்காணிப்புப் பணிகள் மிகவும் முக்கியம் என ராணிப்பேட்டை மாவட்ட தோ்தல் அலுவலா் ச.வளா்மதி எச்சரித்துள்ளாா்.

அரக்கோணம் தொகுதியில் வாக்குப்பதிவுக்கு முந்தைய 72 மணி நேரத்தில் மேற்கொள்ளப்பட வேண்டிய தீவிர கண்காணிப்பு பணிகள் குறித்து ஆலோசனைக் கூட்டம் ஆட்சியா் அலுவலகத்தில் நடைபெற்றது.

இக்கூட்டத்துக்கு ராணிப்பேட்டை மாவட்ட தோ்தல் அலுவலா் ச.வளா்மதி தலைமை வகித்து பேசியது: .

அரக்கோணம் தொகுதிக்கான தோ்தல் முன்னேற்பாடு பணிகள் மற்றும் தோ்தல் கண்காணிப்பு பணிகள் அனைத்தும் தற்பொழுது வரை சிறப்பாக மேற்கொள்ளப்பட்டு வருகின்றன. அதன்படி வாக்குப்பதிவுக்கு 72 மணி நேரத்திற்கு முன்பாக அனைத்து பகுதிகளிலும் தோ்தல் பறக்கும் படைக் குழு, விடியோ கண்காணிப்புக் குழு, நிலையான கண்காணிப்புக் குழுக்கள் தீவிரமாக கண்காணிப்பு பணிகளை மேற்கொள்ள வேண்டும்.

இந்த கண்காணிப்பின்போது வேட்பாளா்கள் வாக்காளா்களுக்கு பணப்பட்டுவாடா அல்லது இதர பொருள்கள் கொடுப்பதாக தகவல் கிடைத்தால் பறக்கும் படையினருக்கு உடனடியாக தகவல் தெரிவிக்கப்பட்டு நடவடிக்கை மேற்கொள்ள வேண்டும்.

மேலும் வாக்குப்பதிவு நடைபெறுவதற்கு முந்தைய 72 மணிநேரத்தில் தோ்தல் கண்காணிப்புப் பணிகள் மிகவும் முக்கியம் என்றாா்.

இதில் மாவட்ட காவல் கண்காணிப்பாளா் டி.வி.கிரண் ஸ்ருதி, மாவட்ட வருவாய் அலுவலா் ந.சுரேஷ், கூடுதல் காவல் கண்காணிப்பாளா்கள் குமாா்,குணசேகரன், சரவணன் மற்றும் அரசு துறைச்சாா்ந்த அலுவலா்கள் கலந்து கொண்டனா்.