அரசு மருத்துவமனையில் ரூ.1.60 கோடியில் அவசர சிகிச்சைப் பிரிவு

வாகன விபத்துகளினால் ஏற்படும் உயிரிழப்புகளைத் தவிர்க்கும் நோக்கத்தில் திருவள்ளூர் தலைமை அரசு மருத்துவமனையில் ரூ.1.60 கோடியில், விபத்து மற்றும் அவசர சிகிச்சைப் பிரிவு தொடங்க அரசு உத்தரவிட்டுள்ளதாக சுகாதாரத்துறை அதிகாரிகள் தெரிவித்தனர். 
 இதுகுறித்து, சுகாதாரத்துறை அதிகாரிகள் கூறியது:   திருவள்ளூர் மாவட்ட தலைமை அரசு மருத்துவமனையில் குழந்தைகள் சிறப்பு சிகிச்சைப் பிரிவு, நோயாளிகள் சிகிச்சைப் பிரிவு, இருதய நோய் சிகிச்சைப் பிரிவு, சிறுநீரக சிகிச்சைப் பிரிவு, எலும்பு மூட்டு அறுவை சிகிச்சைப் பிரிவு உள்ளிட்ட பல்வேறு பிரிவுகள் உள்ளன. விபத்து மற்றும் அவசர சிகிச்சைப் பிரிவு இல்லை. இந்நிலையில், இம்மாவட்டத்தில் அடிக்கடி வாகன விபத்துகள் நடைபெறுகின்றன. இந்த விபத்துகளில் பலத்த காயம் அடைவோர் சிகிச்சைக்காக அரசு மருத்துவமனைகளுக்கு கொண்டு வரப்படுகின்றனர். அப்போது, இந்த மருத்துவமனையில் விபத்து மற்றும் அவசர சிகிச்சைப் பிரிவு இல்லாததால் சென்னை அரசு மருத்துவமனைக்கு அனுப்பி வைக்கின்றனர். 
இதுபோன்று மேல் சிகிச்சைக்காக கொண்டு செல்லும் போது எதிர்பாராதவிதமாக உயிரிழப்புகள் ஏற்படுகின்றன. இதைத் தவிர்க்கும் வகையில் விபத்து மற்றும் அவசர சிகிச்சைப் பிரிவு தொடங்க வேண்டும் என சமூக ஆர்வலர்கள் கோரிக்கை விடுத்து வந்தனர்.
இக்கோரிக்கையை ஏற்று, விபத்து மற்றும் அவசர சிகிச்சைப் பிரிவு தொடங்க ரூ.1.60 கோடி நிதி ஒதுக்கீடு செய்யப்பட்டுள்ளது. இதற்காக, இந்த மருத்துவமனை வளாகத்தில் புதிய கட்டடம் அமைப்பதற்கான நடவடிக்கைகள் மேற்கொள்ளப்பட்டு வருகின்றன. அதேபோல், இம்மாவட்டத்தில் உள்ள பொன்னேரி மற்றும் திருத்தணி அரசு மருத்துவமனைகளிலும் விபத்து மற்றும் அவசர சிகிச்சைப் பிரிவு விரைவில் தொடங்க இருப்பதாகவும் சுகாதாரத்துறை அதிகாரிகள் தெரிவித்தனர்.