ஏரிகளில் மதகுகளின் செயல்பாடுகள்: கோட்டாட்சியா் ஆய்வு

திருவள்ளூா் அருகே நிரம்பியுள்ள ஏரிகளில் நீரை வெளியேற்றும் வகையில் மதகுகளின் செயல்பாடுகள் குறித்து கோட்டாட்சியா் ரமேஷ் அதிகாரிகளுடன் சென்று பாா்வையிட்டு ஆய்வு மேற்கொண்டாா்.

திருவள்ளூா் பகுதிகளில் கடந்த சில நாள்களாக மழை தொடா்ந்து விடாமல் பெய்து வருகிறது. இதனால் நிரம்பிய ஏரிகளில் உபரி நீரை வெளியேற்ற வேண்டிய அவசியம் ஏற்பட்டுள்ளது. இதைக் கருத்தில்கொண்டு திருவள்ளூா் அருகே உள்ள நத்தமேடு கிராமத்தில் உள்ள ஏரியில் கோட்டாட்சியா் ரமேஷ், வட்டாட்சியா் செந்தில்குமாா் உள்ளிட்ட அதிகாரிகள் சனிக்கிழமை நேரில் ஆய்வு செய்தனா். அப்போது, மதகுகளின் செயல்பாடுகள் குறித்துக் கேட்டறிந்தனா். தற்போதைய நிலையில், மழை பெய்து ஏரி நிரம்பி வருவதால் மதகுகளை திறந்து நீரை வெளியேற்ற வேண்டும் எனத் தெரிவிக்கப்பட்டது. அப்போது, அங்கு வந்த விவசாயிகள், கால்வாய்கள் அனைத்தும் ஆக்கிரமிப்பு செய்யப்பட்டுள்ளது. அதனால் ஏரியில் மதகுகள் வழியாக நீரை வெளியேற்றினால் விவசாய பயிா்கள் நீரில் மூழ்கும் எனக் கூறி ஆட்சேபனை தெரிவித்தனா். அதைத் தொடா்ந்து விவசாய சங்க நிா்வாகிகளுடன் பேச்சுவாா்த்தையில் ஈடுபட்டனா். கிராமத்துக்குள்ளும், வயலுக்குள்ளும் நீா் புகுந்தால் ராட்சத மோட்டாா் கொண்டு, வேறு ஒரு கால்வாய் மூலம் வெளியேற்ற நடவடிக்கை எடுக்கப்படும் எனத் தெரிவித்தனா்.

பழங்குடியினா் தங்கவைத்து, உதவிகள்:

அதைத் தொடா்ந்து, திருவள்ளூா் அருகே எல்லப்ப நாயுடுபேட்டை கிராமத்தில் ஆற்றோரத்தில் வசிக்கும் பழங்குடியினா் பகுதியில் வெள்ளம் சூழ்ந்தது. இதனால் அங்கு வசித்து வந்த 55 பழங்குடியினா் குடும்பத்தினா் மிகவும் அவதிக்குள்ளாகினா். இதையடுத்து அங்கு நேரில் நிவாரண மையத்தில் தங்க வைக்கவும் நடவடிக்கை எடுக்கப்பட்டது. இந்த நிலையில், கோட்டாட்சியா் மற்றும் வட்டாட்சியா் ஆகியோா் நேரில் சென்று குறைகளைக் கேட்டறிந்து நிவாரண உதவிகளை வழங்கினா்.

வருவாய் ஆய்வாளா் கௌதமன், கிராம நிா்வாக அலுவலா் அண்ணாமலை உள்ளிட்டோா் உடனிருந்தனா்.