12 ஆயிரம் லிங்கங்களை மீட்டு வழிபாடு நடத்த ஏற்பாடு: திருப்பணிக் குழுமம் தீா்மானம்

தமிழத்தில் பராமரிப்பின்றி உள்ள 12 ஆயிரம் லிங்கங்களை மீட்டு பொதுமக்கள் வழிபாடு நடத்த ஏற்பாடு செய்வதென திருக்கோயில்கள் திருப்பணிக் குழும பொறுப்பாளா்கள் கூட்டத்தில் தீா்மானம் நிறைவேற்றப்பட்டது.

அகஸ்திய கிருபா என்று அழைக்கப்படும் திருக்கோயில்கள் திருப்பணிக் குழுமத்தின் திருவண்ணாமலை மாவட்டப் பொறுப்பாளா்கள் அறிமுகக் கூட்டம் திருவண்ணாமலையில் ஞாயிற்றுக்கிழமை நடைபெற்றது.

கூட்டத்துக்கு ஓய்வு பெற்ற தலைமை ஆசிரியா் வையாபுரி தலைமை வகித்தாா். வேடந்தவாடி ஜெயராமன் வரவேற்றாா்.

அகஸ்திய கிருபா குழுமத்தின் நிறுவனா், திருக்கழுக்குன்றம் அன்புச்செழியன் சுவாமிகள் சிறப்பு அழைப்பாளராகக் கலந்து கொண்டு பக்தா்களுக்கு அருளாசி வழங்கிப் பேசினாா்.

கூட்டத்தில், தமிழகத்தில் அகஸ்திய கிருபா திருப்பணி குழுமம் சாா்பில் 1,800 கோயில்கள் புனரமைப்பு செய்யப்பட்டுள்ளன. மேலும் பராமரிப்பின்றி உள்ள 12 ஆயிரம் லிங்கங்களை மீட்டு புனரமைத்து பொதுமக்கள் வழிபாடு நடத்த ஏற்பாடு செய்வது உள்பட பல்வேறு தீா்மானங்கள் நிறைவேற்றப்பட்டன.

கூட்டத்தில், காஞ்சிபுரம் ராஜேந்திரன், ஆசிரியா் பவனந்தி, மாதலம்பாடி கண்ணன், மற்றும் திருப்பணிக் குழும நிா்வாகிகள் யுவராஜ், சுந்தரமூா்த்தி, செல்வக்குமாா், வெ.ஏழுமலை, இந்திராணி உள்ளிட்டோா் கலந்து கொண்டனா்.