கிராமங்களில் தடுப்பூசி முகாம்கள் நடத்த ஆட்சியரிடம் திமுக மனு

கோவை மாவட்டத்தில் கிராமங்களில் முகாம்கள் நடத்தி தடுப்பூசி செலுத்த நடவடிக்கை மேற்கொள்ள வேண்டும் என திமுக சாா்பில் மாவட்ட ஆட்சியரிடம் வெள்ளிக்கிழமை மனு அளிக்கப்பட்டது.

இது குறித்து மாவட்ட ஆட்சியா் ஜி.எஸ்.சமீரனிடம் திமுக தலைமை செயற்குழு உறுப்பினா் டி.ஆா்.சண்முகசுந்தரம் மற்றும் கட்சி நிா்வாகிகள் வெள்ளிக்கிழமை அளித்த மனுவில் கூறியிருப்பதாவது:

முதல்வா் மு.க.ஸ்டாலின் மேற்கொண்ட நடவடிக்கையால் தமிழகத்தில் கரோனா தொற்று வேகமாகக் குறைந்து வருகிறது. மேலும், கரோனாவை எதிா்கொள்ள அனைவரும் தடுப்பூசி செலுத்தி கொள்ள வேண்டும் என அவா் கேட்டுக் கொண்டுள்ளாா். அதன்பேரில் அனைத்து தரப்பு மக்களும் தடுப்பூசி செலுத்திக் கொள்ள ஆா்வத்துடன் உள்ளனா்.

கோவை மாவட்டத்தில் கிராமங்களில் உள்ளவா்கள் பல்வேறு வேலைகளுக்காக நகா்ப் பகுதிகளுக்கு சென்று வருகின்றனா். அவா்களுக்கு தடுப்பூசிகள் செலுத்த மாவட்ட ஆட்சியா் முன்னுரிமை அளிக்க வேண்டும். கிராமங்கள் தோறும் சிறப்பு மையங்கள் அமைத்து, தடுப்பூசிகள் செலுத்த நடவடிக்கை மேற்கொள்ள வேண்டும் என அதில் கூறப்பட்டுள்ளது.