மொடக்குறிச்சியில் உயர்மின் கோபுரம் அமைக்கும் பணி தொடக்கம்

மொடக்குறிச்சி தாலுகா பகுதியில் விவசாய நிலங்களில் உயர் மின் கோபுரங்கள் அமைக்கும் பணி காவல் துறை பாதுகாப்புடன் புதன்கிழமை தொடங்கியது. 
ஈரோடு மாவட்டத்தில் பல்வேறு இடங்களில் கடந்த சில மாதங்களாக விவசாய நிலங்களில் பவர் கிரிட் நிறுவனம் சார்பில், உயர்மின் கோபுரம் அமைக்க நிலம் கையகப்படுத்தப்பட்டு, அளவீடுகள் நடைபெற்று வந்தது. விவசாயிகள் விவசாய  நிலங்களில் உயர்மின் கோபுரங்கள் அமைக்கக் கூடாது என்றும், தரை வழியாக கேபிள் அமைத்து மின்சாரம் கொண்டு செல்ல வேண்டும் என்றும் கோரிக்கை வைத்து பல்வேறு போராட்டங்களை நடத்தி வருகின்றனர். 
இந்நிலையில், மொடக்குறிச்சியை அடுத்த 60 வேலம்பாளையம் கிராமம், வெள்ளப்பெத்தாம்பாளையம்புதூர் என்ற இடத்தில் அன்னபூரணி  என்ற விவசாயியின் தோட்டத்தில் உயர்மின் கோபுரம் அமைக்கும் பணிகள் புதன்கிழமை துவக்கி வைக்கப்பட்டது. பொக்லைன்  இயந்திரம் மூலம் குழிகள் தோண்டும் பணிகள் நடைபெற்று வருகிறது. 
இதுகுறித்து, இப்பணிகளைப் பார்வையிட்ட ஈரோடு வருவாய் கோட்ட அலுவலர் முருகேசன்  கூறியதாவது: 
தற்போது திருப்பூர் மாவட்டத்திலிருந்து ஈரோடு மாவட்ட எல்லையான நொய்யலாற்றங்கரை கொங்குடையாம்பாளையம் முதல் அறச்சலூர், வெள்ளப்பெத்தாம்பாளையம்புதூர் வழியாக மானூர், சாவடிப்பாளையம் புதூர், காவிரி ஆற்றின் கரையையொட்டி உள்ள குறுக்கபாளையம் வரை மொத்தம் 66 உயர்மின் கோபுரங்கள் அமைக்கப்பட  உள்ளன. உயர்மின் கோபுரங்கள் ஒவ்வொன்றும் 800 கே.வி. திறன் கொண்டதாகவும், 52 மீட்டர் உயரம் கொண்டதாகவும் இருக்கும். மேலும், 400 மீட்டர் தொலைவில் ஒரு உயர்மின் கோபுரம் அமையவும் உள்ளது. மேலும்,  உயர்மின் கோபுரம் அமையவுள்ள இடத்தில் உள்ள விவசாய நிலங்களுக்கு நில மதிப்பீட்டில் 85 சதவீதத் தொகையும், விவசாய நிலத்தில் உள்ள தென்னை மரம் ஒன்றுக்கு  வயதுக்கேற்ப அதிகபட்ச தொகையாக ரூ. 32 ஆயிரத்து 400 வரையும், மேலும் பயிரிடப்பட்டுள்ள பயிருக்கேற்பவும் இழப்பீட்டு தொகை கணக்கிடப்பட்டு விவசாயிகளுக்கு  காசோலைகளாக  வழங்கப்பட்டு வருகிறது என்றார். 
இப்பணியின்போது, மொடக்குறிச்சி வட்டாட்சியர் அஷ்ரபுனிசா, மண்டலதுணை வட்டாட்சியர் சிவசங்கர், வருவாய் ஆய்வாளர்கள் காயத்ரி (மொடக்குறிச்சி), சண்முகபிரியா (அறச்சலூர்), தோட்டக் கலைத் துறை, பொதுப் பணித் துறை, வேளாண்மை பொறியியல் துறை அதிகாரிகள் இருந்தனர்.
பெருந்துறை துணை காவல் கண்காணிப்பாளர் ராஜ்குமார் தலைமையில், அறச்சலூர் காவல் ஆய்வாளர் தங்கவேல், சென்னிமலை காவல் ஆய்வாளர் செல்வராஜ், போலீஸார் பாதுகாப்புப் பணியில் ஈடுபட்டிருந்தனர்.