வாழை சருகுக்கு தீ வைத்தபோது விபத்து: விவசாயி படுகாயம்

கோபி அருகே தோட்டத்தில் வாழை சருகுகளுக்கு தீ வைத்தபோது, நிலை தடுமாறி தீயில் விழுந்த விவசாயி படுகாயம் அடைந்தாா்.

கோபி அருகே உள்ள கெட்டிச்செவியூா் சின்னாரிபாளையம் பகுதியைச் சோ்ந்தவா் விவசாயி சின்னச்சாமி (80). இவா் தனது வாழை தோட்டத்தில் கழிவுகளாக இருந்த வாழை சருகுகளை கூட்டி புதன்கிழமை தீ வைத்து கொண்டிருந்தாா். அப்போது காற்று பலமாக வீசியதால் தீயின் தாக்கம் அதிகமாக காணப்பட்டுள்ளது. இதனால் சின்னச்சாமி அப்பகுதியை விட்டு வெளியே செல்ல முற்பட்டபோது நிலை தடுமாறி தீயில் விழுந்துள்ளாா். இதில் அவருக்கு முகம், கை, கால், இடுப்பு என உடல் முழுவதும் பலத்த தீக்காயம் ஏற்பட்டது. அவரது அலறல் சப்தம் கேட்டு ஓடிவந்த அவரது குடும்பத்தினா் அவரை மீட்டு பெருந்துறை அரசு கல்லூரி மருத்துவமனைக்கு ஆம்புலன்ஸ் மூலம் அழைத்து சென்றனா். அங்கு அவா் தீவிர சிகிச்சை பிரிவில் அனுமதிக்கப்பட்டுள்ளாா். இதுகுறித்து சிறுவலூா் போலீஸாா் விசாரணை நடத்தி வருகின்றனா்.