தருமபுரி மாவட்டம் முழுவதும் 792 விநாயகர் சிலைகள் பிரதிஷ்டை

விநாயகர் சதுர்த்தியையொட்டி தருமபுரி மாவட்டம் முழுவதும் 792 விநாயகர் சிலைகள் பிரதிஷ்டை செய்யப்பட்டுள்ளதாக மாவட்டக் காவல் துறை தரப்பில் கூறப்பட்டது.
இந்தியாவில் சிறப்பாக கொண்டாடப்பட்டு வரும் விழாக்களில் ஒன்று விநாயகர் சதுர்த்தி விழா. வீடுகள்தோறும் மண்ணால்  செய்யப்பட்ட விநாயகர் சிலைகளுக்கு கொழுக்கட்டை, கொண்டைக்கடலை படையலிட்டு சதுர்த்தியை பொதுமக்கள் கொண்டாடி வருகின்றனர்.
பொது வெளியில் விநாயகர் சிலை வைத்து வழிபட்டு சில நாள்கள் கழித்து அவற்றை நீர்நிலைகளில் கரைப்பது தொடர்ந்து நடைபெற்று வருகிறது.
வழக்கம்போல நிகழாண்டிலும் வியாழக்கிழமை விநாயகர் சதுர்த்தி விழாவைக் கொண்டாட பொதுமக்கள் புதன்கிழமை மாலையே தயாராகினர். வணிக மற்றும் கல்வி நிறுவனங்களில் புதன்கிழமையே விநாயகர் சதுர்த்தி கொண்டாடப்பட்டது. பொதுமக்கள் சதுர்த்திக்கு தேவையான பொருள்களை புதன்கிழமை இரவே வாங்கினர்.
மாவட்டம் முழுவதும் பொது இடங்களில் 792  விநாயகர் சிலைகள் புதன்கிழமை பிரதிஷ்டை செய்யப்பட்டதாக மாவட்டக் காவல் துறை சார்பில் தெரிவிக்கப்பட்டது. இந்த எண்ணிக்கை வியாழக்கிழமை உயரலாம் என்றும் தெரிகிறது. தேவையான பாதுகாப்பு ஏற்பாடுகள் செய்யப்பட்டுள்ளதாகவும் போலீஸார் தெரிவித்தனர்.
சிலைகளை கரைப்பதற்கு ஒகேனக்கல் காவிரியாறு, வாணியாறு, ஈச்சம்பாடி அணை, இருமத்தூர் தென்பெண்ணை ஆறு, கேசர்குலி அணை, வரட்டாறு ஆகிய இடங்கள்
அனுமதிக்கப்பட்டுள்ளன.