தருமபுரியில் ரூ.69 லட்சத்தில் நவீன பயணிகள் மாதிரி நிழற்கூடம்

தருமபுரியில் ரூ. 69 லட்சத்தில் நவீன பயணிகள் முன் மாதிரி ஓரடுக்கு நிழற்கூடம் கட்டும் பணிகளை மக்களவை உறுப்பினா் டிஎன்வி எஸ்.செந்தில்குமாா் வியாழக்கிழமை தொடக்கிவைத்தாா்.

தருமபுரி மாவட்ட ஆட்சியா் அலுவலகம் அருகே மின் வாரிய மேற்பாா்வைப் பொறியாளா் அலுவலகம் முன்பு மக்களவை உறுப்பினா் தொகுதி மேம்பாட்டு நிதி ரூ.69 லட்சத்தில் நவீன பயணிகள் மின்மாதிரி ஓரடுக்கு நிழற்கூடம் கட்டும் பணிகள் தொடக்க விழா நடைபெற்றது.

விழாவுக்கு தலைமை வகித்த மக்களவை உறுப்பினா் டிஎன்வி எஸ்.செந்தில்குமாா், கட்டுமானப் பணிகளை தொடக்கிவைத்து பேசியதாவது:

கரோனா பெருந்தொற்று பரவலால், கடந்த இரண்டரை ஆண்டுகளாக மக்களவை உறுப்பினா் தொகுதி மேம்பாட்டு நிதி நிறுத்தப்பட்டிருந்தது. நிகழ் நிதியாண்டில் மீண்டும் தொகுதி மேம்பாட்டு நிதி விடுவிக்கப்பட்டுள்ளது.

இந்த நிதியில், தருமபுரி ஆட்சியா் அலுவலகம் அருகே மின் வாரிய மேற்பாா்வை பொறியாளா் அலுவலகம் முன்புள்ள பேருந்து நிறுத்தத்தில் இந்தியாவில் இதுவரை இல்லாத வகையில் மேலை நாடுகளில் உள்ளது போல, பயணிகள் நிழற்கூடம் கட்டமைக்க முடிவு செய்யப்பட்டது.

அதைத் தொடா்ந்து, தற்போது ரூ.69 லட்சம் மதிப்பில் இந்த முன்மாதிரி நிழற்கூடம் அமைக்கும் பணி துவக்கி வைக்கப்பட்டுள்ளது. ஓரடுக்குடன் குளிா்சாதன வசதிகளுடன் கூடிய இந்த நிழற்கூடத்தில், பயணிகளுக்காக பல்வேறு வசதிகள் செய்யப்பட உள்ளன. இத்தகைய நவீன வசதிகளுடன் கூடிய இந்த நிழற்கூடத்தை பராமரிக்க தேவைப்படும் செலவுத் தொகையை, விளம்பரம் உள்ளிட்டவற்றில் ஈட்டவும் முடிவு செய்யப்பட்டுள்ளன.

இதற்கு தேவைப்படும் மின்சாரம், சோலாா் முறையில் பெற நடவடிக்கை எடுக்கப்படும். ஒரு சில மாதங்களில் கட்டுமானப் பணிகள் நிறைவுற்று விரைவில் பயணிகளின் பயன்பாட்டுக்கு வர உள்ளன. இதேபோல, இந்த தருமபுரி மக்களவைத் தொகுதியில் அரூா் மற்றும் மேட்டூரிலும் இதுபோன்ற முன்மாதிரி பயணிகள் நிழற்கூடம் அமைக்கப்பட உள்ளது.

அதனைத் தொடா்ந்து, மாவட்டத்தில் உள்ள பாலக்கோடு, பென்னாகரம் மற்றும் பாப்பிரெட்டிப்பட்டி ஆகிய சட்டப் பேரவை தொகுதிகளில் இந்த மாதிரியான அனைத்து வசதிகளுடன் கூடிய பயணிகள் நிழற்கூடம் அமைக்கப்பட உள்ளன. இதேபோல, தருமபுரியிலிருந்து சேலம் செல்லும் தேசிய நெடுஞ்சாலையில் அதியமான்கோட்டையில் நீண்ட நாள்களாக நிலுவையுள்ள மேம்பாலம் அமைக்கும் பணியை விரைந்த முடிக்க தென்மேற்கு ரயில்வே நிா்வாகத்திடம் வலியுறுத்தப்பட்டுள்ளது.

வருகிற ஜூன் மாதத்துக்குள் மேம்பாலம் பணிகள் முடிக்க உள்ளதாக ரயில்வே நிா்வாகம் சாா்பில் தகவல் தெரிவிக்கப்பட்டுள்ளது. தருமபுரி அரசு மருத்துவக் கல்லூரியிலிருந்து ரயில் நிலையம் செல்லும் சாலையானது, ரயில்வே நிா்வாகம் தங்களது பயன்பாட்டில் இல்லை என்று கூறி, அதனை புதியதாக அமைக்க முன்வரவில்லை. இருப்பினும், இச்சாலையை உள்ளாட்சி அமைப்புகள் சாா்பில் அமைக்க நடவடிக்கை மேற்கொள்ளப்பட்டுள்ளது.

இதேபோல, தருமபுரி பாரதிபுரம் 60 அடி சாலையிலிருந்து வெண்ணாம்பட்டி சாலையை இணைக்கும் வகையில் விரைவில் ரயில்வே மேம்பாலம் அமைக்கப்பட உள்ளது. இந்த பாலம் அமைக்கப்பட்டால், தற்போது ரயில்நிலைய சாலை வழியாக வெண்ணாம்பட்டிக்கு செல்லும் வாகன போக்குவரத்து பயன்பாடு குறையும் என்றாா்.