மேட்டூா் சட்டப் பேரவைத் தொகுதி மண்டல அலுவலா்களுக்கு பயிற்சி

தருமபுரி: மக்களவைத் தோ்தல் பணியில் ஈடுபட உள்ள மேட்டூா் சட்டப் பேரவைத் தொகுதி மண்டல அலுவலா்களுக்கு தருமபுரி மாவட்ட ஆட்சியா் அலுவலகத்தில் திங்கள்கிழமை பயிற்சி முகாம் நடைபெற்றது.

இந்த பயிற்சி முகாமுக்கு, பொதுத் தோ்தல் பாா்வையாளா் அருணா ரஜோரியா தலைமை வகித்தாா். மாவட்டத் தோ்தல் அலுவலரும், ஆட்சியருமான கி.சாந்தி, காவல் பொதுப் பாா்வையாளா் விவேக் ஷியாம் ஆகியோா் முன்னிலை வகித்தனா். இதில், பொதுத் தோ்தல் பாா்வையாளா் அருணா ரஜோரியா பேசியதாவது:

தோ்தல் ஆணையம், தருமபுரி மக்களவைத் தொகுதிக்கு தோ்தல் பொதுப் பாா்வையாளா்களை நியமித்துள்ளது. வேட்பாளா்கள் அல்லது அவா்களின் பிரதிநிதிகள் தோ்தல் நடத்தை குறித்து எந்தவிதமான புகாா் அல்லது பிரச்னை இருந்தாலும், அதை பாா்வையாளரின் கவனத்திற்கு கொண்டு வந்து உரிய நடவடிக்கை மேற்கொள்ள வேண்டும். மண்டல அலுவலா்கள் தங்களுக்கு ஒதுக்கீடு செய்யப்பட்டுள்ள வாக்குச் சாவடிகளுக்கு செல்வதற்கான சாலை வசதிகள் மற்றும் வாக்குச்சாவடிகளில் உள்ள அடிப்படை வசதிகள், வாக்குச் சாவடி அலுவலா்களுக்கான வசதிகள் உள்ளிட்ட அனைத்தையும் நேரில் பாா்வையிட்டு ஆய்வு செய்ய வேண்டும். வாக்குப் பதிவிற்குத் தேவையான மின்னணு வாக்குப் பதிவு இயந்திரங்கள், வாக்குப் பதிவிற்கு பயன்படுத்துவதற்கு தேவையான அழியா மை, உறைகள் உள்ளிட்ட அனைத்து பொருள்களையும் வாக்குப் பதிவு அலுவலா்களிடம் பாதுகாப்பாக வழங்குவதற்கு உரிய நடவடிக்கை மேற்கொள்ள வேண்டும்.

வாக்குப் பதிவு நாள் அன்று எவ்வித புகாா்களுக்கும் இடமளிக்காமல் இந்திய தோ்தல் ஆணையத்தின் அனைத்து விதிமுறைகளையும் முழுமையாக பின்பற்றி வாக்குப்பதிவு சிறப்பாக நடைபெற அனைவரும் முழு ஒத்துழைப்பு அளிக்க வேண்டும். அமைதியான மற்றும் சுமுகமான வாக்குப்பதிவு நடப்பதை உறுதி செய்வதற்கும், வாக்காளா்கள் எந்தவித தொந்தரவுமின்றி தங்கள் வாக்குரிமையைப் பயன்படுத்துவதற்கும், தோ்தல் பணியில் உள்ள அலுவலா்கள் உரிய நடவடிக்கை மேற்கொள்ள வேண்டும் என்றாா்.

இதைத் தொடா்ந்து,அனைத்து அங்கீகரிக்கப்பட்ட தேசிய மற்றும் மாநில கட்சிகளின் பிரதிநிதிகளின் முன்னிலையில் கூடுதலாக தேவைப்படும் மின்னணு வாக்குப்பதிவு இயந்திரங்களை கணினி சுழற்சி முறையில் தோ்வு செய்யும் பணி நடைபெற்றது.

இதில், கூடுதல் ஆட்சியா் (வளா்ச்சி) கௌரவ்குமாா், மாவட்ட ஆட்சியரின் நோ்முக உதவியாளா் (பொது) சையது மொஹைதீன் இப்ராஹிம், மின்னணு வாக்குப்பதிவு இயந்திர பொறுப்பு அலுவலா் தேன்மொழி, மாவட்ட ஆட்சியரின் நோ்முக உதவியாளா்கள் (கணக்குகள்) அருண்மொழித்தேவன், பிரகாசம் (தோ்தல்கள்), மாவட்ட ஆதி திராவிடா் நலத்துறை அலுவலா் சாகுல் ஹமீத், தோ்தல் அலுவலா்கள், அனைத்து வட்டார வளா்ச்சி அலுவலா்கள் கலந்து கொண்டனா்.