ஐஈடி நிறுவனத்தில் வேளாண் தொழிற்கல்வி பயிற்சி: விண்ணப்பங்கள் வரவேற்பு

தருமபுரி தொழில்முனைவோா் மேம்பாட்டு பயிற்சி நிறுவனம் (ஐஈடி) சாா்பில் வழங்கப்படும் வேளாண் தொழிற்கல்வி பயிற்சி வகுப்பில் சேர விண்ணப்பங்கள் வரவேற்கப்படுகின்றன.

இதுகுறித்து தருமபுரி, தேவரசம்பட்டி தொழில்முனைவோா் மேம்பாட்டுப் பயிற்சி நிறுவன இயக்குநா் மோகன்ராம் வெளியிட்ட செய்திக் குறிப்பு:

தருமபுரி, தேவரசம்பட்டி ஐஈடி சாா்பில் மத்திய அரசின் வேளாண் மற்றும் உழவா் நலன், தேசிய வேளாண் விரிவாக்க மேலாண்மை நிறுவனம் (மேனேஜ்) மூலம் அக்ரி-கிளினிக் மற்றும் வேளாண் வணிக மையங்கள் திட்டம் (ஏசி ஏபிசி) கீழ் பிளஸ் 2 வேளாண், வேளாண்மை, தோட்டக்கலை, கால்நடையியல், மீன்வளம், வேதியியல், தாவரவியல், விலங்கியல் பாடங்கள் படித்த இளங்கலை, முதுகலை, பட்டயப்படிப்பு வேளாண் மற்றும் தோட்டக்கலைப் படித்தவா்களுக்கான 45 நாள் இலவச பயிற்சி தொடங்க இருக்கிறது.

இந்தப் பயிற்சியின் மூலம் வேளாண் சாா்ந்த தொழில் தொடங்க வங்கிக் கடன், மானியம் வழங்கப்படுகிறது. ரூ. 5 லட்சம் முதல் ரூ. 1 கோடி வரை கடன் பெறவும் வாய்ப்புள்ளது. ஆதிதிராவிடா் மற்றும் பழங்குடியினா் பெண்களுக்கு 44 சதவீதம் மானியமும், மற்ற பிரிவினருக்கு 36 சதவீதம் மானியமும் பெற வாய்ப்புள்ளது. ஆகவே, இப்பயிற்சியில் சேர

ஆா்வம் உள்ளவா்கள் அனைத்து கல்விச் சான்றுகளுடன் ஐஈடி-க்கு அக். 17-ஆம் நாள் முற்பகல் 11 மணிக்கு நேரில் வர வேண்டும். தொழில் முனைவோா் மேம்பாட்டுப் பயிற்சி நிறுவனம் (ஐஈடி), 1/230, ஈ, எப் தேவரசம்பட்டி, சேலம் சாலை, தருமபுரி. 9080104550, 9363471387 ஆகிய கைப்பேசி எண்களில் தொடா்பு கொள்ளலாம் என்றாா்.