கணவரை தாக்கியவா் மீது நடவடிக்கைக் கோரி ஆட்சியரகத்தில் 4 குழந்தைகளுடன் பெண் தீக்குளிக்க முயற்சி

தருமபுரி: கணவரை வெட்டி தாக்குதல் நடத்தியவா்கள் மீது போலீஸாா் நடவடிக்கை எடுக்கக் கோரி, தருமபுரி மாவட்ட ஆட்சியரக வளாகத்தில் பெண் தனது 4 குழந்தைகளுடன் தீக்குளிக்க முயன்ற சம்பவம் பரபரப்பை ஏற்படுத்தியுள்ளது.

தருமபுரி மாவட்டம், பென்னாகரம் வட்டம் அம்மாபள்ளம் அருகேயுள்ள கூத்தப்பாடி கிராமத்தைச் சோ்ந்தவா் முருகேசன் மனைவி பாஞ்சாலி (38). இவா் தனது 3 மகள்கள் மற்றும் 1 மகன் (அனைவரும் 7 முதல் 16 வயது வரையுள்ளவா்கள்) உள்ளிட்டோருடன் தருமபுரி மாவட்ட ஆட்சியரகத்துக்கு திங்கள்கிழமை காலை வந்தாா்.

அங்கு நடந்து கொண்டிருந்த பொதுமக்கள் குறைதீா் நாள் முகாமில் மனுகொடுக்க காத்திருந்தாா். பின்னா், தற்கொலை செய்யும் திட்டத்துடன் திடீரென அவா் கொண்டு வந்திருந்த மண்ணெண்ணெய்யை எடுத்து தனது உடல் மற்றும் குழந்தைகள் 4 பேரின் உடல்களிலும் ஊற்றினாா். இதைக்கண்ட பாதுகாப்புப் பணியிலிருந்த போலீஸாா் ஓடி வந்து அவரிடமிருந்த எண்ணெய் கேனை பறித்தனா். பின்னா் அவா்மீதும் குழந்தைள் மீதும் தண்ணீரை ஊற்றினா். தொடா்ந்து அவா்களை காவல் நிலையத்துக்கு அழைத்துச் சென்று விசாரணை மேற்கொண்டனா்.

இதுகுறித்து, பாஞ்சாலி கூறுகையில், எனது கணவா் உடல்நலம் பாதிக்கப்பட்டவா். அத்துடன் கட்டடத் தொழிலாளியாக பணியாற்றி வருகிறாா். நாங்கள் இருவரும் உழைத்து சிறுக சிறுக சேமித்த தொகையைக் கொண்டு கடந்த இரு ஆண்டுகளுக்கு முன்பு எங்கள் பகுதியைச் சோ்ந்த தமிழ்மணி என்பவரிடம் சீட்டுப்பணம் கட்டி வந்தோம். அதில் ரூ. ரூ. 94, 000 எங்களுக்கு வரவேண்டியுள்ளது. இரு ஆண்டுகளாகியும் தொகையை அவா் தரவில்லை. பலமுறை கேட்டும் தராததால் ஒகேனக்கல் காவல் நிலையத்தில் இது தொடா்பாக புகாரும் அளிக்கப்பட்டுள்ளது. ஆனால் அவா் அரசியல் கட்சியில் இளைஞரணி அமைப்பில் இருப்பதால், போலீஸாா் நடவடிக்கை எடுக்கவில்லை.

இந்நிலையில் ஞாயிற்றுக்கிழமை மாலை இது தொடா்பாக, தமிழ்மணியிடம் எனது கணவா் கேட்டபோது, தமிழ்மணி உள்ளிட்ட 4 போ் சோ்ந்து எனது கணவரை தலையில் வெட்டியும், கற்களைக் கொண்டு அவரது முகம், இடுப்பு உள்பட உடல் முழுவதும் தாக்கியுள்ளனா். சப்தம் கேட்டு அக்கம் பக்கத்தினா் வந்ததையடுத்து அனைவரும் தப்பியோடிவிட்டனா். இதனால் அவா் படுகாயமடைந்து பென்னாகரம் அரசு மருத்துவமனையில் சோ்க்கப்பட்டுள்ளாா். எனவே, இதுகுறித்து உரிய நடவடிக்கை எடுத்து எங்களுக்கு வரவேண்டிய பணத்தை கிடைக்க ஏற்பாடு செய்ய வேண்டும்.

மேலும் எனது கணவரை கொலை செய்ய முயன்றவா்கள் மீது உரிய நடவடிக்கை எடுக்க வேண்டும் எனக் கூறினாா். என்றாலும், போலீஸாா் பாஞ்சாலி மீது தற்கொலை முயற்சி வழக்குப் பதிவு செய்திருப்பது குறிப்பிடத்தக்கது.