செய்தி மடல்
இ-பேப்பர்
/
சேலம் மாவட்டம், தம்மம்பட்டி அருகே மண்மலை, சித்தன்பட்டிக்குட்டை பகுதிகளில் உள்ள 2 வீடுகளில் புகுந்த ஹெல்மெட் கொள்ளையா்கள், 20 பவுன் நகை மற்றும் ரூ. 1.5 லட்சத்தை கொள்ளையடித்துச் சென்றனா். இவா்களைப் பிடிக்க போலீஸாா் 2 தனிப் படைகளை அமைத்துள்ளனா்.
தம்மம்பட்டியை அடுத்த கொண்டையம்பள்ளியில், செந்தாரப்பட்டி பிரிவு சாலையில் வசித்து வரும் சேகோ ஆலை அதிபா் சந்திரன். இவரது வீட்டில் சனிக்கிழமை இரவு 9.30 மணியளவில் சுற்றுச்சுவரில் ஏறி உள்ளே நுழைந்த மா்ம நபா்கள், வீட்டின் கதவைத் தட்டியுள்ளனா்.
அப்போது, கதவை திறக்காமல் ஜன்னலை மட்டும் திறந்து பாா்த்த சந்திரனின் கையை கொள்ளையா்கள் பிடித்து வெளியே இழுத்தனா். இதனால் சந்திரன் மற்றும் அவரது குடும்பத்தினா் சப்தம் போட்டதால் கொள்ளையா்கள் அங்கிருந்து தப்பினா்.
தொடா்ந்து தம்மம்பட்டி அருகே செந்தாரப்பட்டியை அடுத்த மண்மலை ஊராட்சி, பாலக்காடு வாணிக்கிணறு பகுதிக்குச் சென்ற கொள்ளையா்கள், ஓய்வுபெற்ற அரசுப் பள்ளி ஊழியா் கணேசன் (62) வீட்டுக்குள் தலைக்கவசம் அணிந்தவாறு இரவு 10.30 மணியளவில் 7 போ் சென்றனா்.
அப்போது, தனது மனைவி செல்வி (57), மகன் பிரசாந்த் (35) ஆகியோருடன் சாப்பிட்டிக்கொண்டிருந்த கணேசன், வந்தது தனது மகன் பிரசாந்தின் நண்பா்கள்தான் என தவறாக நினைத்து, அவா்களையும் சாப்பிட அழைத்துள்ளாா்.
ஆனால், வீட்டுக்குள் நுழைந்து கத்தியைக் காட்டி மிரட்டி 9 பவுன் நகை, ரூ. 50 ஆயிரம் ரொக்கம் மற்றும் 2 கைப்பேசியை கொள்ளையா்கள் பறித்துச் சென்றனா்.
அதன்பிறகு சித்தன்பட்டிக்குட்டையில் வசித்து வரும் விவசாயி மாதேஸ்வரன் (எ) பழனிவேல், அவரது மனைவி செவிலியா் மலா்விழி (49) வீட்டுக்குள் புகுந்து மாதேஸ்வரனின் கையை கத்தியால் வெட்டியுள்ளனா். அப்போது, வீட்டில் உள்ள நகைகளை தராவிட்டால் கணவரைக் கொன்றுவிடுவதாக மலா்விழியை மிரட்டினா். அதன்பிறகு 11 பவுன் நகை மற்றும் ரூ. 1 லட்சத்தை அங்கிருந்து கொள்ளையடித்துச் சென்றனா்.
கொள்ளை சம்பவங்கள் குறித்து தகவல் அறிந்த சேலம் மாவட்டக் காவல் கண்காணிப்பாளா் குத்தாலிங்கம், 3 இடங்களுக்கும் அப்போதே சென்று விசாரணை நடத்தினாா். இந்தச் சம்பவத்தில் 3 பைக்குகளில் வந்த 7 போ், ஹெல்மெட் அணிந்தும், முகக்கவசம் அணிந்தும் ஈடுபட்டது தெரியவந்துள்ளது.
இதையடுத்து, அப்பகுதியில் உள்ள சிசிடிவி காட்சிகளை போலீஸாா் ஆய்வு செய்து வருகின்றனா்.
கொள்ளையா்களைப் பிடிக்க, ஆத்தூா் டிஎஸ்பி சத்யராஜ் தலைமையில், தம்மம்பட்டி காவல் ஆய்வாளா் அழகுராணி மற்றும் காவல் உதவி ஆய்வாளா்கள் கொண்ட 2 தனிப் படைகள் அமைக்கப்பட்டுள்ளன.
கடந்த ஆண்டு மண்மலை பாலக்காடு பகுதியில் ஓய்வுபெற்ற விஏஓ வேணுகோபால் வீட்டில் இதேபோல 60 பவுன் நகை கொள்ளையடிக்கப்பட்டது குறிப்பிடத்தக்கது. தற்போது அதே பகுதியில் மீண்டும் கொள்ளை சம்பவம் நிகழ்ந்துள்ளது.
இதுகுறித்து போலீஸ் தரப்பில் கூறும்போது, 20-க்கும் மேற்பட்ட சிசிடிவி காட்சிகளை ஆய்வு செய்து வருகிறோம். இன்னும் ஓரிரு நாள்களில் கொள்ளைக் கும்பலை பிடித்துவிடுவோம் என்றனா்.
புறக்காவல் நிலையம் அமைக்க கோரிக்கை: தம்மம்பட்டியைப் போலவே செந்தாரப்பட்டியிலும் அதிக மக்கள் வசித்து வருகின்றனா். வருடம் ஒருமுறை செந்தாரப்பட்டி பகுதியில் கொள்ளைச் சம்பவம் நடைபெற்று வருவதையடுத்து, செந்தாரப்பட்டி பகுதியில் புறக்காவல் நிலையம் அமைக்க வேண்டும் என இப்பகுதி மக்கள் வலியுறுத்தினா்.
சித்தன்பட்டிக்குட்டை பகுதியில் கொள்ளைச் சம்பவம் நடந்த வீட்டை ஆய்வு செய்த போலீஸாா்.
பின்னூட்டத்தில் வெளியாகும் கருத்துகளுக்கு அவற்றைப் பதிவிடுவோரே முழுப் பொறுப்பு; அவை தினமணியின் கருத்துகளைப் பிரதிபலிக்கவில்லை.தனிநபர், சமூகம், மதம் அல்லது நாடு ஆகியவற்றுக்கு எதிராக அவமதிக்கிற அல்லது ஆபாசமான விதத்திலுள்ள எந்தவொரு கருத்தும் இந்திய அரசின் தகவல் தொழில்நுட்பக் கொள்கைப்படி தண்டனைக்குரிய குற்றம். இதுபோன்ற கருத்துகளுக்கு எதிராக உரிய சட்ட நடவடிக்கை எடுக்கப்படும்.
