மின்சாரம் பாய்ந்ததில் விவசாயி உயிரிழப்பு

மதுரை: மதுரை மாவட்டம், எம்.சத்திரப்பட்டி அருகே தோட்டத்தில் தண்ணீா் பாய்ச்ச சென்ற விவசாயி மின்சாரம் பாய்ந்ததில் உயிரிழந்தாா்.

வாடிப்பட்டி அருகே உள்ள எம்.மேட்டுப்பட்டியைச் சோ்ந்தவா் கஜேந்திரன் (54). இவருக்கு எம்.சத்திரப்பட்டி அருகே உள்ள காவனூரில் சொந்தமாக கொய்யாத் தோட்டம் உள்ளது. இங்கு கஜேந்திரன் தங்கியிருந்து கொய்யா மரங்களை பராமரித்து வந்தாா்.

இந்த நிலையில், ஞாயிற்றுக்கிழமை தோட்டத்துக்கு தண்ணீா் பாய்ச்ச சென்ற கஜேந்திரன் வீடு திரும்பவில்லை.

இதனால், குடும்பத்தினா் தோட்டத்துக்கு சென்று பாா்த்தனா். அங்கு கஜேந்திரன் இறந்து கிடந்தாா். மின்சாரம் பாய்ந்ததில் அவா் உயிரிழந்தது தெரியவந்தது.

இதுகுறித்து எம்.சத்திரப்பட்டி போலீஸாா் வழக்குப் பதிவு செய்து விசாரித்து வருகின்றனா்.