மாணவா்கள் கவனச் சிதறல்களுக்கு இடமளிக்கக் கூடாது: அமைச்சா் அன்பில் மகேஸ்

மாணவா்கள் கவனச் சில்களுக்கு இடமளிக்காமல் இருக்க வேண்டியது அவசியம் என தமிழக பள்ளிக் கல்வித் துறை அமைச்சா் அன்பில் மகேஸ் பொய்யாமொழி தெரிவித்தாா்.

மதுரை மாவட்டம், உசிலம்பட்டி நாடாா் சரஸ்வதி மேல்நிலைப் பள்ளியில் உசிலம்பட்டி சாரண, சாரணீயா் இயக்க பொன்விழாவில் அவா் மேலும் பேசியதாவது: எவ்வளவு சொத்துகளைச் சோ்த்தாலும் இறுதி வரை நம்முடன் வரக் கூடிய ஒரே சொத்து கல்வி மட்டும்தான். கரையாத ஒரே செல்வம் கல்வி. இதன் காரணமாகவேதான் தமிழக அரசு கல்விக்கு உயா் முக்கியத்துவம் அளிக்கிறது.

மத்திய அரசு இந்தியாவின் கல்வி மேம்பாட்டுக்காக ஒதுக்கீடு செய்த நிதி ரூ. 28 ஆயிரம் கோடி. ஆனால், தமிழக அரசு தமிழகத்தின் கல்வி வளா்ச்சிப் பணிகளுக்காக அளித்த நிதி ஒதுக்கீடு ரூ. 51 ஆயிரம் கோடி. கல்வி மேம்பாட்டுக்கு தமிழக அரசு அளிக்கும் முக்கியத்துவத்துக்கு இது ஓா் சான்று.

தனி மனித ஒழுக்கத்தை, உதவும் மனப்பான்மையை, சுத்தத்தை கற்பிக்கும் இயக்கம் சாரண இயக்கம். இதனால் தான், சாரண இயக்கத் தலைமையிடம் அமைக்கும் பணிக்கு ரூ. 9 கோடியை தமிழக முதல்வா் அளித்துள்ளாா். இது, சாரணா்கள் மீது அவா் வைத்திருக்கும் நம்பிக்கை வெளிப்படுத்துகிறது. கடந்த 4 ஆண்டுகளுக்கு முன்பு 2.5 லட்சமாக இருந்த உறுப்பினா் எண்ணிக்கை தற்போது 10 லட்சத்தை விஞ்சியுள்ளதெனில் அதற்கு தமிழக முதல்வா் அளிக்கும் ஊக்கமே காரணம்.

முந்தையக் காலங்களில் இருந்த ஒரே பொழுதுபோக்கு விளையாட்டு. பிறகு, மாலை நேர பொழுதுபோக்குக்கு ஒரு தொலைக்காட்சி சேனல் வந்தது. தற்போது, உலகமே கைக்குள் வந்துவிட்டது. எண்ணிலடங்கா சேனல்கள், ஏராளமான பொழுதுபோக்குகள். எனவே, மாணவா்கள் மிகுந்த விழிப்புணா்வுடன் இருக்க வேண்டும். எந்தவித கவனச் சிதல்களுக்கும் இடமளிக்கக் கூடாது. பொழுதுபோக்குகளுக்கு அப்பால் ஒரு உலகம் நமக்கு உள்ளது என்பதை மாணவா்கள் எப்போதும் நினைவில் கொள்ள வேண்டும்.

நம்முடைய சமுதாயத்துக்கு நம்மால் இயன்ற நன்மையை செய்ய வேண்டும் என்ற எண்ணத்தை வளா்த்துக் கொள்ள வேண்டும். தங்களின் தனித்திறனை வளா்த்துக் கொண்டு வாழ்க்கையில் வெற்றி காண வேண்டும் என்றாா் அவா்.

தமிழக வணிக வரி, பதிவுத் துறை அமைச்சா் பி. மூா்த்தி, பள்ளிக் கல்வித் துறை இயக்குநா் கண்ணப்பன், தேனி தொகுதி மக்களவை உறுப்பினா் தங்க. தமிழ்ச்செல்வன், சட்டப்பேரவை உறுப்பினா்கள் ஐயப்பன், மு. பூமிநாதன், ஆ. வெங்கடேசன், அரசுத் துறை அலுவலா்கள், சாரண இயக்கப் பொறுப்பாளா்கள், மாணவா்கள் கலந்து கொண்டனா்.