சார்ஆட்சியரிடம் சிறுவியாபாரிகள் மனு

பழனியில் திருவிழா காலங்களில் அடிவாரம் பகுதியில் நூற்றுக்கணக்கான கடைகள்  திறக்கப்படுகிறது. திருக்கோயில், நகராட்சி நிர்வாகங்கள் இணைந்து அடிக்கடி ஆக்கிரமிப்பு கடைகளை அகற்றி வந்தனர். இதைத் தொடர்ந்து பழனி சார்ஆட்சியர் தலைமையில் இரு மாதங்களுக்கு முன் நடைபெற்ற கூட்டத்தில் இடையூறின்றி தொழில் செய்ய அனுமதி கோரி சிறுவியாபாரிகள் மனு அளித்தனர். இதை பரிசீலனை செய்வதாக சார்ஆட்சியர் தெரிவித்திருந்தார்.

இதையடுத்து பழனி சிஐடியூ சாலையோர சிறு விற்பனையாளர் தொழிலாளர்கள் சங்கம் சார்பில் வெள்ளிக்கிழமை சார்ஆட்சியர் வினீத்திடம் மனு அளிக்கப்பட்டது. நிகழ்ச்சியில் முன்னாள் நகர்மன்றத் தலைவர் ராஜமாணிக்கம், சிஐடியூ மாவட்ட தலைவர் மனோகரன், சிபிஐ நகர செயலாளர் குருசாமி உள்ளிட்ட ஏராளமானோர் பங்கேற்றனர். மனுவுடன், சங்கத்தில் உள்ள அடிவாரம் சாலையோரம் தொழில் செய்யும் சிறுவியாபாரிகள் பெயர் பட்டியல், அவர்கள் பழனி பகுதியில்தான் வசிக்கிறார்கள் என்பதற்கான ஆதாரங்கள் இணைக்கப்பட்டுள்ளதாக மனுதாரர்கள் தெரிவித்தனர்.