மதுரை அருகே நான்கு வழிச்சாலையில் அடுத்தடுத்து வாகனங்கள் மோதி விபத்து

திருப்பரங்குன்றத்தை அடுத்த தோப்பூர் நான்கு வழிச்சாலையில் புதன்கிழமை வாகனங்கள் மோதி அடுத்தடுத்து விபத்தில் சிக்கின.
மதுரை அருகே தோப்பூரைச் சேர்ந்தவர் ஒச்சம்மாள். இவர் புதன்கிழமை காலை தோப்பூர் நான்கு வழிச்சாலையை கடக்க முயன்றார். 
அப்போது கேரளாவிலிருந்து பெங்களூரு நோக்கி சென்ற காரை கீர்த்தி பென்டின் என்பவர் ஓட்டி வந்துள்ளார். எதிர்பாராத விதமாக மூதாட்டி சாலையை கடப்பதை பார்த்தவுடன், சுதாரித்து வாகனத்தை பிரேக் போட்டு நிறுத்தியுள்ளார். 
அப்போது  பின்னால் வந்த ராஜசேகர் என்பவர் ஓட்டி வந்த கார், கீர்த்திபென்டின் கார் மீது மோதி தலைகுப்புற கவிழ்ந்தது. இதில் ராஜசேகர் காயமடைந்தார். அப்பகுதியில் அடுத்தடுத்து வாகனங்கள் விபத்தில் சிக்கியதைப் பார்த்த மூதாட்டி ஒச்சம்மாள் மயக்கமடைந்தார். உடனடியாக சம்பவ இடத்திற்கு வந்த ஆஸ்டின்பட்டி போலீஸார் விபத்தில் சிக்கிய வாகனங்களை மீட்டனர். மேலும் விபத்து குறித்து விசாரிக்கின்றனர்.