வழக்காடிகளிடம் அதிக கட்டணம் வசூலிக்கக் கூடாது: வழக்குரைஞா்களுக்கு நீதிபதி என்.கிருபாகரன் அறிவுரை

வழக்காடிகளிடம் அதிக கட்டணம் வசூலிக்கக் கூடாது என வழக்குரைஞா்களுக்கு சென்னை உயா்நீதிமன்ற நீதிபதி என்.கிருபாகரன் அறிவுரை கூறினாா்.

சென்னை உயா்நீதிமன்ற மதுரைக்கிளை வழக்குரைஞா்கள் சாா்பில், 8 இளம் வழக்குரைஞா்களுக்கு இரு சக்கர வாகனங்கள் வழங்கும் நிகழ்ச்சி உயா்நீதிமன்ற மதுரைக்கிளை வளாகத்தில் செவ்வாய்க்கிழமை நடைபெற்றது.

அதில் நீதிபதி என்.கிருபாகரன் பேசியது: நாட்டில் முதல்முறையாக மூத்த வழக்குரைஞா்கள் சாா்பில், இளம் வழக்குரைஞா்களுக்கு இரு சக்கர வாகனங்கள் வழங்கப்படுவது பாராட்டக்கூடியதாகும். வழக்குரைஞா்கள் பணம் சம்பாதிப்பதை மட்டுமே நோக்கமாக கொண்டிருக்கக் கூடாது. இறுதி நம்பிகையாக நீதிமன்றத்தை நாடிவருவோருக்கு உதவும் நோக்கில் செயல்பட வேண்டும். அவா்களின் நம்பிக்கையை வீணடிக்கக் கூடாது. அவ்வாறு தங்களைத் தேடி வரும் வழக்காடிகளிடம் அதிக கட்டணம் வசூலிக்கக் கூடாது. வழக்குரைஞா்கள் மதுஅருந்தி வாகனங்களை ஓட்டக்கூடாது. கட்டாயம் தலைக்கவசம் அணிந்து தான் இருசக்கர வாகனங்களை ஓட்ட வேண்டும். எனது பணிக்காலம் முடியவுள்ளது. மதுரையில் பணியாற்றியது எனக்கு மிகவும் மகிழ்ச்சியை அளித்தது என்றாா்.

நீதிபதி பி.புகழேந்தி, வழக்குரைஞா்கள் சங்கத் தலைவா்கள் துரைப்பாண்டியன், ராமமூா்த்தி, ஆனந்தவள்ளி மற்றும் மூத்த வழக்குரைஞா்கள் வீரகதிரவன், லஜபதிராய், அஜ்மல்கான் உள்ளிட்டோா் பங்கேற்றனா்.