மதுரையிலிருந்து திருப்பதிக்கு நவ.19-ல் விமான சேவை தொடக்கம்

மதுரை விமான நிலையத்தில் இருந்து நாள்தோறும் திருப்பதிக்கு விமானசேவை வருகின்ற நவம்பர் 19ம் தேதியில் இருந்து தொடங்குகிறது.

மதுரை விமான நிலையத்திலிருந்து சென்னை, பெங்களூர், மும்பை, ஹைதராபாத், புதுதில்லி என நாளொன்றுக்கு 20 விமானங்கள் இயக்கப்படுகின்றன.

மேலும் மதுரையில் இருந்து துபாய்க்கு வாரத்தில் மூன்று நாட்கள் வெளிநாட்டு விமான சேவை இயக்கப்பட்டு வருகிறது. இந்நிலையில் மதுரையில் இருந்து திருப்பதிக்கு விமான சேவை வேண்டும் என பக்தர்கள் நீண்ட காலம் கோரிக்கை விடுத்திருந்தனர்.

அதனடிப்படையில் தனியார் விமான நிறுவனம் வருகின்ற நவம்பர் மாதம் 19 ஆம் தேதியிலிருந்து மதுரையிலிரந்து தினமும் திருப்பதிக்கு விமான சேவை செய்ய உள்ளது.

அதன்படி மதுரையில் இருந்து இந்த விமானம் தினமும் மதியம் 3 மணிக்கு புறப்பாடாகி மாலை 4.20 மணிக்கு திருப்பதி சென்றடையும். மீண்டும் அதே விமானம் மாலை 4.40 மணிக்கு திருப்பதியில் இருந்து புறப்பட்டு 6.04 மணிக்கு மதுரை வந்தடையும்.

அதற்கான முன்பதிவு சேவையை தனியார் டிராவல்ஸ் நிறுவனங்கள் தற்போது தொடங்கியுள்ளன. மதுரையில் இருந்து திருப்பதிக்கு ரூபாய் 3,500 கட்டணம் வசூலிக்கப்படுவதாகவும் அவர்கள் தெரிவித்தனர். மதுரையில் இருந்து திருப்பதிக்கு விமான சேவை என்பது பெருமாள் பக்தர்களுக்கு பெரும் மகிழ்ச்சியை உண்டாக்கியுள்ளது.