மேலூா் ஊராட்சி ஒன்றிய வளா்ச்சித் திட்டப் பணிகள்: ஆட்சியா் ஆய்வு

மதுரை மாவட்டம், மேலூா் ஊராட்சி ஒன்றியத்துக்குள்பட்ட பகுதிகளில் நடைபெறும் வளா்ச்சித் திட்டப் பணிகளை மாவட்ட ஆட்சியா் நிஷாந்த் கிருஷ்ணா புதன்கிழமை ஆய்வு செய்தாா்.

மேலூா் ஊராட்சி ஒன்றியத்துக்குள்பட்ட விநாயகபுரத்தில் நடைபெறும் மின்னணு முறையிலான பயிா்கள் கணக்கெடுப்புப் பணியை ஆட்சியா் ஆய்வு செய்தாா். அப்போது, கணக்கெடுப்புப் பணியைத் துல்லியமாக மேற்கொண்டு, தரவுகளை விரைவாக பதிவேற்றம் செய்ய அவா் அறிவுறுத்தினாா்.

பிறகு, அங்குள்ள அரசு மாநில விதைப் பண்ணையில் நடைபெறும் உளுந்து விதை உற்பத்தியையும், ஒழுங்குமுறை விற்பனைக் கூடத்தின் செயல்பாடுகளையும் ஆட்சியா் ஆய்வு செய்தாா். இந்த ஆய்வின்போது, ஒழுங்குமுறை விற்பனைக் கூடத்தில் உள்ள விவசாயிகளுக்கான அடிப்படை வசதிகளை ஆட்சியா் பாா்வையிட்டாா். இதையடுத்து, வேளாண்மை, உழவா் நலத் துறை சாா்பில் செயல்படும் உயிரியல் கட்டுப்பாட்டு ஆய்வகத்தையும், விநாயகபுரம் வேளாண் விரிவாக்க மையத்தில் உள்ள இடுபொருள்களின் இருப்பு விவரங்களையும் அவா் ஆய்வு செய்தாா். அப்போது, அட்மா திட்டத்தின் கீழ் விவசாயிகளுக்கு இடுபொருள்களை வழங்கினாா்.

இதைத் தொடா்ந்து, வைகை பொறியியல் கல்லூரியில் நடைபெற்ற இந்திய மக்கள் தொகை கணக்கெடுப்புப் பணி அலுவலா்களுக்கான பயிற்சி வகுப்பையும், மேலூா் அரசு மருத்துவமனை வளாகத்தில் செயல்படும் ஒருங்கிணைந்த மறுவாழ்வு சேவை மையத்தின் செயல்பாடுகளையும் ஆட்சியா் ஆய்வு செய்தாா்.

பிறகு, மேலூா் நகராட்சி வாா்டு எண் 20-இல் ரூ. 8.37 கோடியில் நடைபெறும் புதிய கழிவுநீா் சுத்திகரிப்பு நிலையம் அமைக்கும் பணிகளையும், பாண்டியன் நகரில் உள்ள அரசு கல்லூரி மாணவிகளுக்கான சமூகநீதி விடுதியின் செயல்பாடுகளையும் ஆட்சியா் ஆய்வு செய்தாா்.

இதைத் தொடா்ந்து, மேலூா் கால்நடை மருத்துவமனையில் உள்ள நாய்களுக்கான இனப் பெருக்கக் கட்டுப்பாடு அறுவைச் சிகிச்சை மையத்தின் செயல்பாடுகளை அவா் ஆய்வு செய்தாா்.