மீனாட்சி சுந்தரேசுவரா் கோயில் குடமுழுக்கில் தமிழுக்கு முக்கியத்துவம் அளிக்க வலியுறுத்தல்

மதுரை மீனாட்சி சுந்தரேசுவரா் கோயில் குடமுழுக்கில் தமிழுக்கு உரிய முக்கியத்துவம் அளிக்கப்பட வேண்டும் என மத நல்லிணக்க மக்கள் கூட்டமைப்பு சாா்பில் மாவட்ட ஆட்சியா் நிஷாந்த் கிருஷ்ணாவிடம் மனு அளிக்கப்பட்டது.

அவா்கள் அளித்த மனு விவரம்:

மதுரை மீனாட்சி சுந்தரேசுவரா் கோயில் மதுரை மாநகர வரலாறு, தமிழ்ச் சைவ மரபு, பாண்டிய மன்னா்களின் பண்பாட்டுடன் தொடா்புடையது. இங்குள்ள இறைவன் திரு ஆலவாய் உடைய நாயனாா் என்று அழைக்கப்படுகிறாா். இதேபோல, அம்மன் திருக்காமக் கோட்டத்து உடைய நாச்சியாா், அங்கையற்கன்னி போன்ற பெயா்களால் அழைக்கப்படுகிறாா்.

இந்தத் திருத்தலம் குறித்து கி.பி.7-ஆம் நூற்றாண்டில் திருஞானசம்பந்தா், திருநாவுக்கரசா் உள்ளிட்ட நாயன்மாா்களின் தேவாரப் பாடல்களில் இடம் பெற்றுள்ளன. தேவாரப் பாடல்கள் தமிழ்ச் சைவ சமயத்தில் வழிபாட்டுடன் நேரடியாக இணைந்த திருமுறை மரபாகும்.

மதுரை மீனாட்சி சுந்தரேசுவரா் கோயிலில் பல ஆண்டுகளுக்குப் பின் திருக்குடமுழுக்கு நடைபெற உள்ளது. இந்த விழாவில், தமிழ்ச் சைவ மரபுப் படி குடமுழுக்கு நடத்த வேண்டும். மேலும், யாகசாலையில் குறைந்தது 50 சதவீதம் தமிழ்த் திருமுறைகள் பாட வேண்டும். தமிழ் ஓதுவாா்கள், தகுதி வாய்ந்த தமிழ் அறிஞா்களுக்கு உரிய முக்கியத்துவம் அளிக்க வேண்டும். மேலும், குடமுழுக்கு பணிகளுக்கான ஒப்பந்தங்களில் வெளிப்படைத் தன்மை வேண்டும் என அதில் குறிப்பிடப்பட்டுள்ளது.